Shillong, Jylliew, 17: Uwei u rangbah uba la tip kyrteng u Suku Mejar, 40 snem ka rta uba shong basah ha Down-Gate, Nongpoh, Ribhoi District u la pynkut noh ïa la ka jong ka jingim ha u tyllai phasi ha kawei ka ïing jah kaba don sha trai jong ka ing mala kaba don ha Nongpoh.
Une u rangbah u dei uba la don saw ngut ki khun bad uba ju trei bylla sngi katba ïoh bad namar ba um shym la sah lang bad ki khun mynta la bun bun snem u la thiah kat haba lap ka miet.
Dei tad ha ka por kumba 10 baje mynstep ki paidbah kiba ïaid najan kane ka ing, ki la lap ïa ka met jong u Bah Mejar uba la sdien phasi ia lade da u tyllai phasi bad mar mar ki la pyntip noh sha ki bor pyniaid shnong bad kumjuh sha ki Pulit jong ka Nongpoh Police Station.
Ia ka met jong u Bah Suku Mejar la shimti noh da ki Pulit ban pynkit sha Nongpoh Civil Hospital ban pynlong ia ka jingtohkit.
