Shillong, Jylliew 11: Ka Kong Bindas Syiem, ka longkmie na ka shnong Mawlong Nongtluh, Ribhoi District kaba la shong shah thngan khlem pud sngi ha Parking Lot kaba don markhap bad ka ophis Additional Secretariat, Shillong ha ka sngi Baar mynta ka taiew ka la weng noh ia ka jingshah thngan bad leit phai sha la ing da ka jingsuk mynsiem hadien ba ka la ioh jingkular da ka jingthoh na ka Sorkar Jylla.
Ka jingweng noh jong ka Kong Bindas Syiem ia ka jingshah thngan, ka la jia tang hapoh khyndiat kynta ba u Symbud Myntri Rangbah ka Jylla uba peit ia ka tnat PWD (Roads) u Bah Prestone Tynsong u la khot iakren ia kane ka longkmie ha Main Secretariat ha ka sngi Baar hadien ba ka jingshah thngan ka la kynjoh sha ka sngi kaba san.
Ka Kong Bindas ka la sdang ia ka jingshah thngan ha ka 6 tarik mynta u bnai ha ka por 12:30 baje mynsngi ban pyrshah ia ka jingleh meinah bad leh matlah jong ka Sorkar Jylla ia ka jingjot rathai ka surok Nongpoh-Umden-Sonapur kaba la pynsuhsat haduh katta katta ia ka leit ka wan, ka rah ka rong jong ki paidbah bad khamtam eh ia kiba pang ba shitom.
Kane ka longkmie ka la weng noh ia ka jingiakhih hadien ba ka Sorkar ka la khlei ia la ka jong ka jubanlak da kaba phah ruh da ka jingthoh ban shna noh ia ka surok Nongpoh-Umden-Sonapur.
Katkum ka jingthoh ba la phah da u Secretary ka tnat PWD (Roads) ka Sorkar Jylla u Bah KK Mawa, la pyntip ba ka surok Nongpoh-Umden-Sonapur kaba jrong 59.00 kilomitar la tyrwa ban pynrung hapoh ka NES1DS (Roads) bad PMGSY0-III.
U Secretary ka PWD (Roads) u la pyntip ba ia ka surok na Nongpoh sha Umden kaba 20 kilomitar la tyrwa ban pynrung hapoh ka NESIDS (Roads) ban sa bei pisa da ka Ministry of DoNER ha ka jingmang pisa kaba kot T52 klur.
“Ha u Lber, 2024, ka Ministry of DoNER ka la buh hakhmat eh ban shna noh ia ka surok naduh Nongpoh sha Umden kaba jrong 20 kilomitar. Kane ka projek ka la sahteng na ka daw ka jingpynbna ia ka elekshon Lok Sabha bad ka jingtreikam jong ka Model Code of Conduct (MCC). Ka Detailed Project Report (DPR) ka dang don ha ka jingpynkhreh bad ia kaba yn sa phah sha ka tnat Planning ha kaba kut mynta u bnai bad ka tnat Planning kan sa phah ia ka DPR sha ka Ministry of DoNER lyngba ka NEC Secretariat ba kan mang pisa,” la pyntip u Secretary ka tnat PWD (Roads).
Shuh shuh, u Secretary u la pyntip ba ka jingbteng ban shna sa ia ka surok naduh Umden sha Byrnihat bad ha ki shnong ba marjan ba kane ka surok ka iaid lyngba sa 39 kilomitar la tyrwa ban pynrung hapoh ka PMGSY-III ha ka jingmang pisa kaba kot antad kumba T. 50.95 klur. Ia ka jingtyrwa (proposal) la thep ha ka Online Management, Monitoring and Accounting System (OMMAS) jong ka PMGSY.
“Ka jingialang jong ka Empowered Committee hapoh ka Ministry of Rural Development, Sorkar India na ka bynta ban mang pisa ia kane ka skhim la khmihlynti ba kan urlong noh shen. Kine ki dei ki ar tylli ki projek ba ladep shimkhia, hapoh une u snem 2024,” la pyntip shuh shuh u Secretary ka tnat PWD (Roads).
