Mawkyrwat, Jylliew, 11: Ka Khasi Students Union, South West Khasi Hills District ryngkat ka KSU Mawkyrwat Circle ka la sei madan da ka jubab RTI ia ka jyrsieh thungkam thungjam sopsop hapoh ka tnat ka koit ka khiah ha South West Khasi Hills District, kata, ha ki Sub-Centre, ki PHC, ki CHC bad ha Mawkyrwat Civil Hospital.
Katkum ka jubab RTI ba la ioh pdiang da ka KSU na ka ophis DHS, Shillong bad na ka ophis District Health and Medical Officer (DM&HO) South West Khasi Hills, la lap ba ki don haduh 112 tylli ki post ba la shu thung khlem da khot ia ka Advertisement bad khlem da pynlong ia ka interview.
Ha ka jingiakren ha ki lad pathai khubor ha ka sngi Baar, u President ka KSU South West Khasi Hills District samla Forwardman Nongrem u la iathuh ba katkum ki jingtip lyngba ka jubab RTI, ki don haduh 51 tylli ki Officiating Post, 54 tylli ki Casual Post bad 7 tylli ki Non-Sanction Post, ha ki jaka sumar bapher bapher hapoh ka South West Khasi Hills District ha kaba ka tnat ka koit ka khiah ka la shu thung sopsop khlem da pynbna paitbah bad khlem da khot interview, kaba la ktah haduh katta katta ia ka hok jong ki samla wadkam wadjam ba la nang la stad hapoh ka district.
“Ka seng ka pynrem jur ia kane ka jingleh jong ka tnat ka koit ka khiah da kaba thungkam khlem da bud ia ki kyndon bad shen ka KSU kan sa ujor ia kane da ka jingthoh ha ki bor ba dei peit bad ban dawa ba ka tnat ka koit ka khiah ka dei ban pynbeit mardor ia kane da kaba weng ia kine ki post bad ban pynbna paitbah lyngba ki Advertisement,” la ong u President ka KSU.
