Shillong, K’lyngkot, 15: U Myntri Rangbah ka jylla ha ka sngi Balang u la ong ba ka jingïakren pynbeit pud ha ka wat kaba ar hapdeng ka Assam bad ka Meghalaya ban ïapynbeit ïa ki jaka ba don hapdeng ka jingïakajia pud kan sa sdang biang shen.
“Ngi la rai ban ïakynduh tang shu kut kine ki elekshon bad ngin sa pynbeit noh shen ïa ka sngi bad ka por,’ ong u Sangma haba ïakren bad ki lad pathai khubor.
“Ha ka jingshisha nga la ïakren hynnin ka sngi bad u Myntri Rangbah ka Assam u Himanta Biswa Sarma halor ki katto katne kiwei pat ki mat. Ngi dang ïakren ïa ki katto katne kiwei pat ki bynta. Ngi la kdew ïa kane ka mat shaphang kane ka jingïalang kaba la slem bha kumta u la kyrpad ïa nga ban ai jingmut ban pynbeit ïa ka sngi bad ka por bad nga kyrmen ba ngin sa lah ban ïakynduh shen,” u la bynrap.
Halor ka jingkynnoh ba ka Sorkar ka la kyntur pud be-aiñ, u Sangma u la ong, “hooid ka rukom treikam kaba kyllum ka la long ba ngi hap ban ailad ïa ka jingpynroi hapoh ki skhim ka Sorkar Pdeng ban pyntreikam, kano kano ka jylla kaba pyntreikam ïa ka, ki paidbah kim dei ban mad jingeh bad lada don kino kino ki skhim ba kyrpang kiba dang pyntreikam nangta da ka jingïamir jingmut bad ki Deputy Commissioner, dei ban ïaid beit shakhmat. Kata ka dei ka nongrim ba kongsan hynrei kaba shai ka long namarba ka dei ka jaka kaba heh bha bad ki kynhun bapher bapher ki don bynta, ki lah ban don ki jingjia ha kaba don ki riewshimet kiba leh ei ei bad don pat ki bym leh ei ei – kumta kita ki jingjia ki lah ban mih hynrei ki Deputy Commissioner ki dang peit bniah ïa kino kino ki mat kiba jia na ka por sha ka por.”
“Ha ka jingshisha lada don kino kino ki jingeh kiba mih, kino kino ki lah ban pyntip ïa nga ha ka mobile phone jong nga bad kata ka jingpyntip lyngba ka telephone kan leit beit beit sha u Myntri Rangbah ka Assam. Kumta ngi don ka jingïadei kaba khlaiñ bha ban pynthikna ba kan ym don kano kano ka jingeh ne ka jingjia bym sngewtynnad ha ki por ki ban dang wan bad ban pynduna ïa ki jingeh ha kine ki jaka ba don ka jingïakajia,” u la bynrap.
Da kaba pynpaw ba ka jingpynneh kan ym lah ban weng ïa ka jingeh, u la ong, “ngim lah ban shu pyndem ïa ka nongrim ba ngi ieng. Ngim lah ban ailad ba kiei kiei kin long khlem da ïamir jingmut bad ngi. Kumta ki don ki katto katne kiba ngin hap ban iengskhem bha hynrei ngi hap ban pynthikna ban pynurlong ïa kaei kaba ngi ïakren.”
“Ka dei ka mat kaba jwat bha bad bun ki sohkyrdoh kiba ïasoh kiba la don ha kine ki 52 snem kumta ka shim por ban pynbeit ïa kine ki jingeh katba ngi dang ïaid shakhmat. Ngi la ïaid shakhmat bad ngi kyrmen ba lyngba ka jingpyrshang ngin sa lah ban pynbeit ïa kiba bun ki jingeh ha ki por ban wan,” u la bynrap shuh shuh.
