Shillong, ïaïong, 03: Thik ha ka por 12 baje mynsngi ka sngi Balang ki nongialam ka Khasi Students Union (KSU) Seng Kmie bad ki nongialam ka KSU South Khasi Hills District Unit ryngkat ka jingsynran lang jong ki bahaing hasem ki la tur paidbah sha Sohra Police Station hadien ba ki Pulit ki la kem ia ki arngut ki dkhot jong ka seng ha ka por shiteng synnia jong ka sngi Baar na Wah-u-Tim bad na Saitsohpen.
Kine ki arngut ki dkhot ka KSU South Khasi Hills District Unit ki la shah kem halor ka jingshah pyniap jong ki arngut ki bar jylla kiba la tip kyrteng kum u Ishan Singh bad u Sudip Dutta ha ka shnong Ichamati ha ka 27 tarik Lber.
Ki Pulit ki la syrtap ia ka Sohra Police Station hadien ba u President jong ka KSU South Khasi Hills District Unit u samla Reebok Diengdoh u la pynbna ba ka seng kan tur paidbah ha kane ka sngi.
Shwa ba ki nongialam jong ka KSU Seng Kmie ba kynthup ia u Rueben Najiar President jong ka KSU South Khasi Hills District Unit u samla Reebok Diengdoh kin rung sha phyllaw jong ka thanat kumba shiteng kynta eiei ka la mih ka thma ktien hadien ba ki Pulit ki la pakhang lynti ia ki nongialam ka KSU hadien ba kim shym la shah satia ban rung paidbah hapoh ka phyllaw jong ka thanat.
Hadien ka jingiakren, ki bor synshar district ha ryngkat ki Pulit ki la shah tang ia katto katne ngut ki nongialam ka KSU ban rung shapoh thanat ban iakren katba kiba bun ki dkhot ki la ap shabar.
Katba ki nongialam ka KSU ki dang don shapoh thanat, ki paidbah shynrang bad kynthei ki la hylla bad risa ha khyrdop jong ka thanat.
Kane ka jingtur paidbah jong ka KSU sha Sohra Police Station ka long ban pan jubab na ki Pulit halor ka jingshah kem jong ki arngut ki dkhot ka seng bad ha kajuh ka por ka KSU ka la kyntait ia ka jingshah pharep ba ki dkhot jong ka seng ki dei kiba donkti ban pyniap ia ki arngut ki bar jylla ha ka shnong Ichamati.
Ha ka sngi Baar, tang hapoh khyndiat kynta ba u President ka KSU South Khasi Hills District Unit u la khot bad wer ban mih paidbah ban tur sha Sohra Police Station, na ka liang jong ka Hynñiewtrep Youths Council (HYC) Sohra Circle ka la ai jingkyrshan ia kane ka jingkhot jingwer jong ka KSU bad kyntu ruh ia ki paidbah ka thain Sohra ban mih paidbah lang ha kane ka sngi.
Ia ka khubor kaba bniah kaba mih na ka jingiakren hapdeng ki nongialam ka KSU bad ki bor Pulit yn sa nang wanrah shuh shuh kham katto katne por.
