Shillong, ïaïong, 03: Ka Kong Pandora Diengdoh, kaba dei ka Kmie jong u President ka KSU, South Khasi Hills District Unit ka la iathuh ba ha ka miet shiteng synnia ka sngi Baar ba ki Pulit ki la leit khynra ia ka ingsah jong ki ha ka shnong Laitryngew, ki la kyndar ia ka jingkhang iing khlem kren wat shi kyntien ruh bad iathuh ruh ba ka jingkyndar ia ka jingkhang jong ka iing la sngew kumba kin shu rat noh wat ia ka ïing.
Ha ka jingiakren bad ki lad pathai khubor ha ka sngi Balang hadien ba la mih na Sohra Police Station, ka Kong Pandora ka la ong, “ki (Pulit) wan sha ing ha ka por shi baje, shi baje tam (eiei). Nga iohsngew, hynrei ban khyllie ia ka khmat ngam lah. Nga iohsngew ia ka jingwan ki kali, nga iohsngew ia ka jingiaid ki briew sha phyllaw ing ruh bad sha kyndong ki ia ieng. Ki (Pulit) tied ia ka ing, nga sngap, nga la pynshah skhor bha. U khun shynrang u khie u kren, ka khun kynthei ka hylla, ka mai, wat plie ia u briew ba khlem kren.”
“Lada ym kren u khun jong nga ruh ki (Pulit) la mut ban shu rat ia ka jingkhang. Ki (Pulit) rung ha ing arngut ne lai ngut. Nga iohsngew ba ki phah tbeh bording. Ki rung sha kamra thiah, sha painkhana ruh ki phah tbeh bording tangba ym don bording. Tangba la don u nongieng u nongap sha kyndong ruh,” la iathuh ka Kong Pandora.
Haba kylli, ka la ong, “ha,oid ki (Pulit)wan wad ia u Reebok. Ynda la ki la phet nga la shu duwai Blei ba u dang ieid ia nga. Un (Reebok) leit don ha ing haleh tip shuh kin ialeh kumno, ioh ki leh kumba leh ia u Bah Cheris. Nga lei nga la tieng eh ha kato ka miet.”
“Ki (Pulit) kylli, (ngi) ong ba u don sha Shillong. Ki kylli haei u sah haei u don. Kato ka para ka ong ba ynda i leit jingleit i shait leit sah sha iing ki paralok. Ynda ki (Pulit) la mih nangta ki ong ia ngin ia leit sha Shillong.
