Shillong, Naiwieng, 14: U General Secretary ka North Eastern Hills University Students Union (NEHUSU) u samla Toniho Kharsati u la ong ba ka jingshah thngan ba khlem pud sngi jong ki samla pule kan dang ïai bteng watla ka Ministry of Education ka la thung ïa ka komti kaba arngut ki dkhot ban tohkit ïa ki kynrum kynram hapoh ka skulbah NEHU.
Ha ka hukum ba la pynmih ha ka sngi Palei, ka Ministry of Education ka la pyntip ba ka komiti ka kynthup ïa u Prof DP Singh, uba dei u Chairman jong ka UGC kum u Chairman jong ka komiti bad u Prof Dilip Chandra Nath, u Vice Chancellor barim ka Assam University.
Ka Ministry ka la shim ïa ka rai, hadien ka jingïakhih shah thngan ba khlem pud sngi ba la lamkhmat da ka North Eastern Hill University Students Union (NEHUSU) bad ba la kyrshan da ka Khasi Students’ Union (KSU – NEHU Unit) mynta la shiphew sngi kynthih, kiba dawa ban weng mardor ïa u Vice Chancellor u Prof P.S Shukla, ïa u Registrar u Omkar Singh bad ïa u Deputy Registrar u Amit Gupta.
“Ngi la ïohi ïa ka hukum ba la pynmih da ka Ministry of Education ha kaba la thung arngut ki dkhot jong ka Enquiry Committee hynrei ngin ïai dawa beit ban weng ïa u Vice Chancellor na ka shuki,” u la ong.
“Ka jingtohkit ba la thung da ka Ministry kan ïaid la ka jong ka lynti bad ma ngi ngin ieng beit ha ka nongrim kumba ngi la ïakhih naduh kaba sdang ban weng ïa u Vice Chancellor,” u la bynrap.
U la pynpaw ruh ïa ka jingsngewdiaw halor ka jingbym shym la kynthup ïa ki trai jylla hapoh ka komiti tohkit namarba la thung tang da ki briew kiba nabar ki bym don ka jingshemphang shaphang ki jinglong jingman hapoh ka skulbah NEHU.
