Shillong, Nohprah, 08: Ka Central Executive Committee jong ka Jaiñtia National Council (JNC) ha ka Lah Sngi u Blei ka la rai ban pynlong da ka jingïakhih paidbah hakhmat ka ophis u Deputy Commissioner ka East Jaiñtia Hills District ha ka 10 tarik mynta u bnai ban pyrshah ïa ka jingthmu ban tei ïa ka Shree Cement Integrated Cement Plant ha ka shnong Daistong, East Jaiñtia Hills District.
Ha u kyrwoh ba la phah sha ki lad pathai khubor, ka seng ka la ong, ‘kane ka rai ka la wan halor ka jingsngap jar jong ka Sorkar ha kaba ïadei bad ki jingujor kiba bun bad ka jingkynnoh ba la pynkylla be-aiñ ïa ki jaka jong ki riewlum bad la pynkheiñ ruh ïa ka Meghalaya Transfer of Land Regulations Act, 1971.”
U President ka JNC u Bah Sambormi Lyngdoh ha u kyrwoh ba la phah da ka video u la ong, “kumba ngi la maham mynshwa, lada ym don jingjubab eiei na ka Sorkar hadien ba ngi la aiti ïa ki jingujor ngin ym shong kli kti bad ngin sa pynlong da ka jingïakhih.”
U President ka JNC u la batai ruh ïa ka jingbud ryntih jong ki jingpyntip ba la phah sha ki ophis Sorkar bapher bapher ha kine ki taiew ba ladep. “Ha ka 28 tarik, Naiwieng, 2025 ngi la aiti ïa ka jingujor sha u Deputy Commissioner, East Jaiñtia Hills bad na ka liang jong u ruh u ladep ban phah ïa ka shithi sha ka MSPCB bad sha ka SEIAA. Ha ka 3 tarik, Nohprah, 2025 ïa ki shithi pynshai ba kyrkieh la phah sha u CEM ka JHADC. Ha ka 4 tarik, Nohprah, 2025 la phah ïa ka jingujor kaba bniah sha ka Commissioner ka tnad Land Revenue and Disaster Management, Shillong.”
“Hynrei kaba sngewsih ka long ba haduh kine ki sngi ym shym la don kano kano ka jubab na kano kano ka tnat Sorkar,” la ong u President.
“Ngi kyntu ïa ki nongshong shnong jong ki jaka kiba shah ktah khamtam ïa ki nongshong shnong jong ka Daistong bad ïa ki shnong ba marjan kiba shah ktah ba wat tieng bad wat sngew jynjar ka JNC ka ieng skhem bad phi bad ngi kyrpad jur ïa phi ba phin wan ban ïasnohkti lang bad ngi,”la ong u President ka JNC.
