Shillong, Risaw, 29: Ka Kynhun Myntri jong ka Sorkar Jylla ha ka sngi Balang ka la mynjur ban pynkhreh shwa ïa ka Electoral Roll na ka bynta ka jingpynlong ïa ka elekshon sha ka Iingdorbar Thawaiñ ka Garo Hills Autonomous District Council (GHADC), ka ban sa long ha u snem 2026.
Ha ka jingïakren bad ki lad pathai khubor hadien ba la wai ka jingïalang u Myntri ka Sorkar Jylla Bah Wailadmiki Shylla uba long ruh u nongaiktien jong ka Sorkar MDA u la ong ba ka Sorkar ka la pynsdang ïa ka kam, watla ïa ka tarik ban pynlong ïa ka elekshon ym pat lah ban shim rai.
U Bah Shylla u la batai ruh ba ka Sorkar ka hap ban pynkhreh shwa ïa ka electoral roll khnang ban pynthikna ba ka Electoral Roll kan long kaba la pynkhreh nadong shadong shwa ka elekshon.
Ka Kynhun Myntri ka la mynjur ïa ka tarik ban pynkhreh ïa ka Draft Electoral Roll, ka jingkam bad ka jingujor, bad ka Electoral Roll ba khatduh.
Ha kaba ïadei bad ka jingbym ïoh thep vote ki bar jylla ha ka elekshon GHADC u Commissioner and Secretary Bah Cyril VD Diengdoh u la ong ba ki Deputy Commissioner kin hap ban bud ïa ka Autonomous District Rule, 1951 kaba batai bniah bin pa bin ïa ki kyndon.
U Bah Diengdoh u la ïaiban ba ki rules dei ban bud pyrkhing, bad ka jingkam bad ka jingujor yn sa ailad ruh ïa ki nongthep vote.
