Shillong, Nailur 27 : Ka seng Hynniewtrep Achik National Movement lane ka HANM ka dei ka seng kaba la suit la shor ha ka 26 tarik u Nailur 2008 bad mynta kane ka seng ka la iaid lynti sha u mawmer ba 15 snem. Ki 15 snem ki jingiaid lynti kim long kiba suk, ki nongialam bad ki dkhot jong kane ka seng ki la iaid lyngba ki rai eh rai dam bad bun ki shiah kiba thar ha ka jingim jong ki.
Ki don ki khep ba ki dkhot jong kane ka seng ki hap ban shong phatok da ki taiew bad da ki bnai, u President rangbah jong kane ka seng u bah Lamphrang Kharbani u la shong phatok la bunsien kumjuh ruh kiwei pat ki nongialam bad ki dkhot ki la shong phatok namar kiba bun ki mat ba ki iakhih na ka bynta ka Ri bad ka jaitbynriew.
Ka HANM ka la rakhe ia ka jingdap 15 snem jong ka ha ka 26 tarik u Nailur, 2023. Shi bynta kum ka jingrakhe ia ka jingdap 15 snem ka HANM ka la ioh ban plie ia ka ophis ba pura jong ka kaba don ha ka shnong Mawkasiang , New Shillong . U kongsan ha kane ka sngi u dei u Myntri ka Hima Mylliem u bah K. Langstieh katba u Symbud kongsan pat u dei u Myntri M. B. Kharlukhi. Ha kane ka sngi u kongsan u la pyllait paidbah ruh ia ka Ambulance jong ka seng HANM ka ban ai jingshakri ia ki paidbah ha ka pang ka shitom.
Haba kren ha ka jingialang kaba lyngkot, u Myntri Langstieh u la ai jingiaroh ia ka seng HANM namarba ka dei ka seng kaba ieng ha ka nongrim ban iada ia ka khyndew ka shyiap bad u pud u sam. U la ong ba ka Hima Mylliem ka dei ka Hima kaba don bun ki jaka ia kajia pud bad ka Assam bad u kyrmen ba lyngba ka jingiatreilang ka HANM bad ka Hima lah ban iada ia ka khyndew ka shyiap bad ia ka hok longtrai ia ki jaka puta.
U Myntri Kharlukhi pat u la pynpaw ba ka them metor ka dei kawei na ki mat kaba ym tang ki sengbhalang hynrei baroh ki kwah ban pynkynriah noh ia ki briew kiba sah hangtei bad ia kane u la ong ba ka Hima Mylliem ka la leh la ka kamram da kaba aiti ia ka jaka sha ka sorkar bad kyrmen ba ka sorkar kan leh ia kaba donkam.
