Shillong, Nailur, 26: Ka Khasi Student Union (KSU) East Jaiñtia Hills District Unit lyngba ka Education Cell hadien ka jingujor na ki katto katne ki nongshong shnong ka shnong Rymbai ba ym don nonghikai Science la shi snem kynthih ha Rymbai Government Secondary School naduh ba ka Sorkar ka la pynkynriah kam ia ki nonghikai kiba ju don ha kane ka skul hynrei haduh mynta ka Sorkar kam pat lah ban thung biang da kiwei ban long nonghikai ba pura.
Kane ka long ka jingduh nong kaba khraw bha ia ki khynnah khamtam ki ban pynkhreh ia ka eksamin SSLC.
Ka seng ka la kyntu ïa ka tnad Pule Puthi ban shimkhia mardor halor kane ka kam khnang ba ki khynnah pule ha kane ka skul kin ïoh ïa ka jing myntoi ba paka khamtam ia ki khynnah ki ban pynkhreh ia ka eksamin SSLC bad ka seng ka dap da jingsngew bynniaw ba ki khynnah ka skul ki la duh noh ia jinghikai ha ka sobjek Science tang na ka daw ba ka Sorkar kam shym la shim khia satia bad patiaw ia ki skul kiba don sha palat sor.
Ka seng ka la lap ruh ba ki kamra klas ki la khapngiah shaba palat pud. Ka seng ka la kyntu jur ia ka Sorkar ban shimkhia mardor ban pynbiang ia ki nonghikai ha baroh ki sobjek bad ki kamra klas ki dei ban long kiba kylluid.
Ka seng lyngba une u kyrwoh, ka kwah ban pynsngew sha ka sorkar ba ka dei ban pynkiew kyrdan noh ia kane ka skul sha Higher Secondary School namar ba haduh mynta ym pat don Higher Secondary School ha East Jaintia Hills.
Ka Seng ka la tip ba ka la don ka jingtyrwa kumba lai snem mynshwa bad ka daw ka long ba ym pat tei ia ka building bad ka seng ka lap ba ia ka building la jan shna pyndep bad ka Sorkar ka dei ban phai khmat ban kyntiew kyrdan ia ka Secondary school sha ka Higher Secondary School.
