Shillong, Nailar, 08: Ka Meghalaya Public Service Commission (MPSC) la pyndem toiñ hakhmat ki jingdawa jong ka Khasi Students Union da kaba ai jingmynjur ban pynmih ïa ki Answer Keys (Prelims) kiba bakla bad kiba dei bad ïa ki Marks hapoh arphew saw kynta.
Kane ka jingmynjur jong ka MPSC ka long hadien ka jingpynibor jong ki dkhot ka Khasi Students Union (KSU) ha ka sien kaba ar ha kaba kiba la tur sha ophis treikam jong ka Commission ha ka sngi Palei ban rah plakad bad thang ïa u tyngshop bamsap naduh ka por 11 baje mynstep.
Ki dkhot ka KSU ki la shong beit triang kumba lai kynta duna ha phyllaw jong ka MPSC haduh ka por 7:00 baje janmiet ban ap ïa ka khubor kaba mih na ka jingïakren hapdeng u Chairman jong ka MPSC bad ki nongïalam jong ka KSU.
Katba ki dkhot ka KSU ba la lamkhmat da u President u samla Lambokstarwell Marngar ki dang pynlong ka jingïakhih, la wan poi ki Pulit bad ki Magistrate ban peitngor ba kan ym don kano kano ka jingjia kaba lah ban pynmih jingkulmar.
Ha ka jingïakren, ka MPSC ka la mynjur ba lai tylli ki jingkylli kiba bakla bad ki jubab kiba dei yn pynmih hapoh ka 24 kynta.
Nalor kata, la rai ban pynmih paidbah ïa ki marks jong ki kyrtong kiba ïakhun ïa ka Prelims jong ka Meghalaya Civil Services Examination hapoh 24 kynta.
Ka KSU ka la dawa ba ïa ka personal interview na ka bynta ka por jong ka Meghalaya Police Service ka dei ban long katkum ka Orginal Advertisement 2019 ha kaba ka ration 1:2.5 bad kam dei ban long katkum ka Office Memorandum ba thymmai kaba la pynkylla ïa ka ratio sha ka 1:1.5. Halor kane, u Chairman u la pan por ban ïathir ïatai shwa hapoh ka jingïalang bad kiwei kiwei ki dkhot. Ïa mynta, ka personal Interview ba la buh ban pynlong ha ka 20 tarik bad ha ka 21 tarik Nailar, 2024 dei ban pyndam noh tad haduh ban da pynbna da kumwei pat.
Ka KSU ka la dawa ïa ka Commission ba ki Roll Number ki dei ban long beit kijuh naduh ba la pynlong ïa ka Prelims tad haduh ban da pynlong ïa ka Personal Interview na ka bynta ka Meghalaya Civil Service examination.
Ïa ka jingpynbna (Notification) kaba 6 tarik, Nailar, 2024 yn pyndam noh bad ïa ki marks ruh dei ban pyni paidbah.
Ha ka jingïakren bad ki lad pathai khubor u President jong ka KSU u la ong, “ka seng ka la ïakren bad ka sorkar ba ka dei ban pynthymmai ïa ka jingtreikam bad ban pynbeit ïa ka jingtreikam bad ki briew kiba shong hangne (ha MPSC) ki dei ban lah ban pyntyllun ïa ka kam.
Haba pynkynmaw ïa ka jingïakren bad u Chairman jong ka MPSC ha ka sien banyngkong u President ka KSU u la ong, “ha ka jingïakren kaba nyngkong, ka jingïakren shapoh ka long kaba beit hynrei tang hapoh katto katne kynta ka don ka jingkylla. Ka pynlong ïa ka KSU ban wan biang mynta ka sngi sa shisien ban pynbor ïa ki mat jingdawa jong ngi hadien ba ngi la shong baroh shisngi.”
“Ngi ngeit ba kane ka dei tang ka jingsdang, ha kine ki sngi ban sa wan ngin sa ïakynduh bad ki bor sorkar kumno ban pynbha ïa ki jingtreikam jong ka MPSC bad kumno ban pynthikna ba ka jingtreikam jong ka MPSC kan long kaba khuid ba suba,” u la ong.
“Ngim kwah shuh, ba kumba ong mano re ha ki por mynshwa ba ka MPSC ka dei ka jaka thep kam jong kita kiba don jingïadei bad ki lei san snem, ka jingthepkam namarba ka don ka jingïadei bad ki ophisar sorkar, ka dei ka jaka thep kam jong kita kiba don ïa ka spah ka phew. Lada kane ka shlem treikam ka don ka jingtreikam kaba khuid kaba suba ka don ka jingkyrmen ïa ki khun samla ki bym don ka jingithuh ïano ïano hynrei kiba lah biang pura ka kyrdan pule jong ki bad ka jabieng kaba nep,” la ong shuh shuh u President ka KSU.
