Shillong, Lber, 7: Ka Meghalaya Energy Corporation Limited (MeECL) ha ka sngi Palei ka la ot noh ia ka bording na ki longing kiba shong basah be-aiñ ha Maxwelton Estate hadien ka jingujor jong ka KSU Laban Circle ha ka sngi Balang ha u Chairman ka MeECL bad ha u Director ka MePDCL.
Ka jingujor jong ka KSU ka long ba ki briew kiba sah beaiñ ha Maxwelton Estate ki tuh ia ka bording ilektrik bad dawa ba dei ban phah ot noh mardor.
Mardor ka MeECL ka la phah ia ki nongtrei ha ka step sngi Palei ban khmih ia ka jingshisha hadien ba la ioh ujor na ka KSU.
Ha ka jingjurip, ka MeECL ka la lap ba ka don shisha ka jingtuh bor ding ilektrik bad la lap ruh ba don ki longiing ba na uwei u meter ki ai bording sha 14 tylli ki iing, don kiwei kiwei pat kiba ai bording sha 4-5 tylli ki iing bad kumta ter ter.
Na ka liang jong ka MeECL ka la ot bording lut ia baroh kine ki iing kiba tuh bording bad kin sa ai Notis ruh ia kine ki briew ha kine ki sngi ban shah daiñ kuna.
Ka MeECL ka la lap ba ki don 27 tylli ki longiing kiba biang ia u Meter bording (20 postpaid bad 7 prepaid) bad kine ki ai pat sha kumba 50 tylli eiei ki iing (re-sale) kaba long beaiñ. Ka MeECL ka la ot ruh ia bording na kine ki 50 tylli eiei ki iing.
Ka Seng ka ai jingiaroh bad ka sngewnguh shibun ia ka jingkitkhiah bad ka jingkloi jong ka tnad MeECL ban hiar jurip ban leh ia kaba donkam.
Ka Seng kan sa leit ai dorkhas sa shisien ba kine ki briew ki ym ioh ban aplai ia ka bording khlem ki kot ki sla kiba biang bad khlem ioh ia ka NOC na ka Dorbar Shnong bad ha kajuh ka por ruh ban pan jingpynshai ba kumne kine kiwei ki 27 tylli ki iing ki ioh ilektrik bording bad ki kot ki sla kaba kumno ki ai ban ioh, khamtam ia kiba leh prepaid connection kiba dang shu aplai dang shen.
Lyngba une u kyrwoh, ka Seng ka kyntu ruh ia ka Shillong Municipal Board (SMB) ban weng noh ia ki masi na kane ka jaka katkum ki kyndon aiñ kumba la kular hakhmat ka Deputy Commissoner ha 29 tarik u Rymphang, 2024. Lada ka SMB ka pynslem ka Seng kan pynlong da ka jingiakhih ha khmat Ophis jong ka SMB.
