New Delhi, Lber 7: Ka President jong ka ri India ka Droupadi Murmu ha ka sngi balang ka la pynkup burom da ka khusnam Sangeet Natak Akademi Awards (Akademi Puraskar) na ka bynta u snem 2022 bad 2023 sha ki 91 ngut ki riewpawkhmat kiba la paw pyrthei bha ha ka liang ka lariti ha ka jingialang pynkup burom kaba la long ha Vigyan Bhawan, New Delhi.
Na kane ka jylla Meghalaya, i Kong Helen Giri i la ioh pdiang ia ka khusnam Sangeet Natak Akademi na ka bynta u snem 2023 halor u synñiang u bynbei ba i la noh sha u sup u thiar jong ka put ka tem tynrai ha Meghalaya.
La kha ia i Kong Helen Giri ha ka 7 tarik Rymphang, 1944, bad i dei ka longkmie kaba la trei shitom khlem shongthait ban kyntiew bad ban pynneh pynsah ia ka shad Khasi. Kum kawei na ki nongrwai bapawkhmat jong ka All India Radio, Shillong, i Kong Helen Giri i la trei shitom ruh ban pynpawnam ia ki tiar tem tiar put u Khasi ha ka rynsan jong ka ri. Kum ka nongrwai ha kylleng ki bynta ka ri India bad shabar ka ri India, i Kong Helen Giri i la ioh bha ia ka jingithuh na kylleng.
I Kong Helen Giri ym tang ba i ju iashim bynta ha kiba bun ki prokram bad ki tamasa, hynrei i ju pynlong ruh ia ki tamasa ban pynpawnam ia ki jingrwai bad ki jingshad tynrai ha Meghalaya. Lyngba kane ka jingtrei shitom, i la pynkhie im ia ka lariti bad ka kolshor, khamtam ha kaba iadei bad ka riti ka dustur Khasi. Shuh shuh, i la shimkhia ban ithuh ia ki Master Craftsmen kiba ju shna ia ki tiar tem tiar put Khasi. Kane ka jingthrang jong i, ym tang kaba pynneh pynsah ia ka jingtrei bani jong ki nongshna tiar tem hynrei ka long ruh kum ka lad aikam ia ki briew kiba ju shna ia kine ki tiar.
I Kong Helen Giri i dei iba la ioh pdiang ia ka khusnam Padma Shri halor ka jingnoh synñiang sha ka lariti bad ka kolshor jong ka Meghalaya ha u snem 2008.
Ha ka jingsam ia kane ka khusnam la sakhi lang da u Myntri uba khmih ia ka tnat Culture, Tourism bad DoNER u G. Kishan Reddy, u Myntri Khynnah ka tnat Law & Justice (Independent Charge) bad Parliamentary Affairs and Culture u Arjun Ram Meghwal, u Secretary ka Ministry of Culture u Govind Mohan, u Chairman jong ka Sangeet Natak Akademi u Dr. Sandhya Purecha bad kiwei kiwei.
