Shillong, Nailur, 26: Palat 27 ngut ki briew ki la ïap na ka jingpang lamwir kaba ïabit na ka jingshah dait ha ki ksew bad ki miaw hapoh ka jylla Meghalaya ha ki ar snem ba la leit noh watla ka Sorkar Jylla ka la rai ban wad ïa ki lad ki lynti ban pynïoh ïa ka dawai injek anti-rabies vaccination wat ha ki primary health centre kiba don ha ki shnong bapher bapher jong ki district ka jylla.
Ha ka jingïakren bad ki lad pathai khubor ka Myntri jong ka Sorkar Jylla kaba khmih ïa ka tnat ka Koit ka Khiah ka Dr. Mazel Ampareen Lyngdoh ka la ïathuh ba ka sorkar la shimkhia bha bad ha ka jingrakhe kaba shi taiew kynthih ïa ka World Rabies Week ka la don ruh ka jingtyrwa ba dei ban pynkut noh mardor ïa kane ka jingpang.
Shwa kane, ka State Surveillance Officer of Integrated Disease Surveillance Programme ka Dr. Valarie Laloo kaba long ruh ka Nodal Officer for Rabies ka la ïathuh ba ki don 27 ngut ki briew kiba la ïap na ka jingpang ba ki la ïabit na kaba shah dait ha ki ksew bad ki miaw ha kaba 11 tylli ki dei ki jingjia ha u snem 2023 bad 16 tylli ki dei kiba la jia haduh u bnai Nailur, 2024.
Ki distrik kiba kham jur bha ka jingïap jong ki briew ba shah dait ha ki mrad ki long ka West Khasi Hills bad ka West Jaiñtia Hills. Ha kine ki ar tylli ki distrik ki don mar 6 tylli ki jingjia ïap briew na ka jingshah dait ha ki mrad.
Katkum ka jingong jong ka, 96 percent na ki jingïap ki dei kiba shah dait ha ki ksew.
Ka jingjia ha ka sien kaba khathyniew ka dei ka jingïap ba dangshen jong kawei ka Mid Level Health Provider (MLHP) kaba la shah dait ha ki ksew shang makia ha surok la kumba ar bnai mynshwa.
“Kane ka jingjia ka long kaba sngewsih nalor ba ka dei ka nongai jingsumar kum ka MLHP, hynrei ka la khladnoh na ka jingpang shah dait ksew, kaba lah ban ïada shi spah na ka shi spah bad ha kajuh ka por kaba ma shi spah na ka shi spah
Da kaba ai injek tika bad da kaba tah dawai ka jingmong ha ka por kaba biang, lah ban ïada ïa u khñiang jingpang hynrei kaba sngewsih ka long na ki daw bym lah ban tip, ka MLHP kam shym la ïoh ïa ka injek tika ha ka por kaba biang bad kumba nga la kdew ka jingpang Rabbies ka dei kaba shyrkhei bha bad lada ki dak ki shin ki la paw shabar kam long satia kaba suk ban pynkoit bad ka jingpang ka la nang kham jur,” la ong ka Dr. Laloo.
Haba kylli, ka Dr. Laloo ka la ong ba ka jingïap na ka jingpang Rabbies ka dei ruh na ka jingbym don jingtip bad ka jingbym kit khiah na lade ban wad jingsumar ha ka por kaba biang.
