Shillong, Jylliew, 21: Ka Joint Action Committee ki khun ki hajar ka Hima Sohiong ha ka sngi Thohdieng ka la kyrpad ia ka Khasi Hills Autonomous District Council ban pyndep noh hapoh shi bnai ia ka jingjied ia u Lyngdoh bathymmai jong ka Hima Sohiong.
Ka Executive Committee jong ka Khasi Hills Autonomous District Council ha ka 14 tarik, Jylliew, 2024 ka la pynmih ia ka jingpynbna sha ka Hima Sohiong baroh kawei hadien ka jingkhmih bniah ia ka kaiphod tohkit jong u Inquiry Officer la shem ba u Bah Banshemphang Thabah u la pynkheiñ ia ka Section-6 jong ka United Khasi and Jaiñtia Hills Autonomous District (Appointment and Succession of Chief and Headmen) Act, 1959.
Ha kane ka jingpynbna u Deputy Secretary jong ka Executive Committee ka Khasi Hills Autonomous District Council u la pyntip ba la weng noh shi syndon ia u Bashemphang Thabah kum u Lyngdoh jong ka Hima Sohiong katkum kane ka kyndon.
Ia mynta ia ka synshar ka khadar hapoh ka Hima Sohiong la peit bad pyniaid da u Acting Lyngdoh.
Ha ka jingiakren bad ki lad pathai khubor u Bah Purningstar Shabong uba dei u Chairman jong ka JAC ki khun ki hajar ka Hima Sohiong u la ong ba ka jingjied ia u Lyngdoh ba thymmai jong ka Hima Sohiong ka dei ban long da ki khun ki hajar jong ka Hima Sohiong ym shuh da ki Saw Lyngdoh kumba ju long ha ki snem ba la leit noh.
“Ngi sngewthuh lada ym don hi u Lyngdoh bapura ka lah ban buh jingeh ia kiba bun. Ka jingdon jong u Acting Lyngdoh um lah satia ban weng ia ka jingeh jong ki khun ki hajar ka Hima. Dei na kata ka daw ngi kwah ba ka District Council kan pynkloi ban buh tarik bad ban pynbna noh kham kloi ia ka elekshon jied Lyngdoh hapoh ka Hima Sohiong,” u la ong.
