Shillobg, Jylliew 10 : Ka Krishi Vigyan Kendra (KVK) East Khasi Hills hapoh ka Tnad Rep-Riang bad ka Bha ka Miat ki Nongrep (Department of Agriculture and Farmers Welfare), Meghalaya, ka la pynlong ia ka prokram pynshai paidbah bad ia ka jingiamir jingmut lang hapdeng ki nongrep bad ki stad saian hapoh ka Khet Bachao Abhiyan 2026 na ka bynta ka jingmyntoi ki nongrep mynta ka sngi ha shnong Sohlap hapoh Shella Bholaganj Block. Kane ka jingialap ka thmu ban kyntiew ia ki nongrep da ki buit rep saian ba thymmai, ki lad kamai jakpoh ba neh ba sah, bad ki rukom pynneh ia ka jingkoit jingkhiah ka khyndew kiba la pynwan dur kyrpang na ka bynta ki jaka lum jong kane ka thain.
Ia kane ka prokram ba kordor la pyniaid da u Shri S. Rani, Director of Agriculture, Sorkar Meghalaya. La synran ia u da ki heh ophisar na sorkar pdeng bad sorkar jylla, kiba kynthup ia u Shri Jintu Das, Director, Directorate of Jute Development, Kolkata, Ministry of Agriculture bad Farmers’ Welfare, bad u Shri K. Dutta, Senior Technical Officer, Directorate of Jute Development, Kolkata. Na ka liang ka sorkar jylla la mihkhmat ruh da i Smti Monica Mawthoh, Deputy Director. Ka jingpyniaid ha ka thaiñ bad sub-division la lamkhmat da u Shri E. Shadap, Sub-Divisional Agriculture Officer (SDAO), Sohra Subdivision, ryngkat bad kiwei de ki heh ophisar na ka ophis District Agriculture Officer (DAO) bad Horticultural Development Officer (HDO).
Ha ka jingiakren halor ki bynta ka saian, ki heh sorkar pdeng na ka Directorate of Jute Development ki la pynleit jingmut bha ban pynithuh ia ki lad kamai ba thymmai sha ki nongrep da kaba ai ki jingkren ba kyrpang halor ka rep ia u jute (Jingthung ba ioh sai borni), ka rukom pynmih ia u, bad ka jingmyntoi pisa na u- na ka bynta ka jylla. Hadien ka jingkren na ki heh sorkar pdeng, ka kynhun saiantis bad ki Subject Matter Specialists (SMS) na KVK East Khasi Hills ki la shimti ban hikai halor ki jingeh ba ki nongrep ki iakynduh ha la ki jong ki lyngkha. Ki stad saian ki la ai ki jingbatai bniah halor ka Jingpynneh ia u Khyndew bad ki Sboh (Soil & Nutrient Management), da kaba pynshai ia ki rukom treikam jong ka Integrated Nutrient Management (INM) na ka bynta ban pynneh ia ka jingbha ka khyndew, ki buit treikam ban sngewthuh ia ki rukom thew (testing) ia ka khyndew, bad ka jingpyndonkam ia ki Soil Health Card khnang ban pynroi ia ka jingmih bad pynduna ia ka jinglut.
Ha kaba kut jong kane ka prokram la ban jur ha kaba pynkylla sha ki rukom rep ba iadei bad ka mariang. Ka kynhun KVK ka la ai ki jinghikai kiba donkam halor ka jingbud ia ki Rukom Rep Tynrai (Natural Farming Practices) na ka bynta ban pynneh ia ka jingkoit jingkhiah u khyndew ka mariang, da kaba pyni ia ki rukom shna sboh ba suk bad duna dor (composting) bad ka jingpyndonkam hok ia ki sboh dawai karkhana. La pynleit jingmut kyrpang ruh halor ka jingpyndonkam ia ki sboh phngit mariang (biofertilizers) kiba lah pynbiang na ka bynta ki jingthung ba rem dor jong ka thain kiba kynthup ia u kwai, u tympew, bad u sohmrit, ban ai ha ki nongrep jong ka Sohlap ki lad jingiarap lyngba ka saian ban pynbha ia ki jingthung jong ki. Ki heh ophisar ki la iaroh shibun ia ka jingtrei shitom jong ka kynhun KVK ha kaba pyniaid ia ka prokram Khet Bachao Abhiyan 2026 sha ki blok bapher, bad ki la ong ba kum kine ki jingiakynduh hapdeng ki nongrep bad ki saiantis ki long kiba donkam bha ban pynthikna ia ka jingneh jong ka kam rep ha baroh kawei ka jylla Meghalaya.
