Shillong, Nailur 28: Ka Ïingbishar Meghalaya High Court ka la hukum ïa ka National Highways Authority of India (NHAI) ban shna noh mardor ïa ka surokbah National Highway-6 kaba la jot rathai.
“Ka Ïingbishar kam kwah ban tip ïa ka jingïaphah shithi hapdeng ki ophisar ka NHAI lane ka jingthoh kaba bthah ïa ki Kontraktor, kaei kaba kongsan ka long lano ka kam kan sdang bad lano yn pyndep ban pynlong ka surok kaba pynsuk ïa ka leit ka wan ki kali bad namarkata, ban shna pyndep da ka surok kaba skhem,” ong ka Division Bench ba kynthup ïa u Chief Justice u Sanjib Banerjee bad u Justice B. Bhattacharjee ha ka hukum ha kaba shong bishar ïa ka PIL halor kane ka kam.
Ka NHAI ka la phah ïa ka Affidavit ha ka 27 tarik Nailur, da kaba pynpaw ba u Regional Officer jong ka NHAI uba don ha Guwahati u la dep leit jngoh ïa ka surok ha ka 16 tarik Nailur.
Ïa ka jingbthah jong u Regional Officer la buh jingthoh halor ka jingleit jngoh jong u ïa ka surok ha ka 16 tarik Nailur.
Ka la ong ba ladep pynmih ïa ka jingbthah kaba janai ha ka 19 tarik Nailur 2023 sha uwei na ki Kontraktor bad ïa u Project Director jong ka NHAI ban shim ïa ki lad ki lynti ban shna noh mardor ïa ka lynter jong ka surok NH -6 naduh Jowai shaduh Ratacherra.
Ka Bench ka la kdew ruh halor ki shithi kiba ïadei bad ki ar tylli ki jaka ba jur tam ka jingsniew ka surok ha sor Khliehriat bad hajan ka Tunnel ha Sonapyrdi.
Ka Iingbishar ka la lap ruh ba kam pat don satia kano kano ka dak ban maramot ïa ka surok ha shwa ka 15 tarik Risaw 2023 bad ban shna pynbha ïa ka surok ha ka lynter kaba jrong 57 kilomitar ïa kaba yn pyndep shwa ka 15 tarik Naiwieng 2023.
“La khmihlynti ba ïa ka pisa dei ban pyllait na ka bynta ka jingtrei ka ban sdang noh manla ka sngi,” la ong ka hukum.
Ka Ingbishar ka la bthah ïa u nongmudui bad ïa ka NHAI ba kin pynpaw ïa ki kam ba la pyntrei haduh mynta.
La bthah ruh ïa u Deputy Commissioner jong ka East Jaiñtia Hills District ban phah ïa ka kaiphod halor ka jingpyntrei ïa ka kam ha Sor Khliehriat bad shabar ka sor Khliehriat haduh ka bynta ba shathie jong ka shnong Lumshnong.
Ka Ïngbishar ka la buh sngi ban shong bishar biang ïa kane ka kam ha ka 5 tarik Risaw 2023.
