Shillong, Nailur, 28: Ka jingbym kohnguh jong u Sordar ka Elaka Laitlyngkot ïa ka jingbthah jong ka Khasi Hills Autonomous District Council (KHADC) ka la pynlong ïa ki nongshong shnong jong ka dong Nongthymmai-Lumthangding ban shong khlem Rangbah Shnong mynta la shi snem saw bnai eiei.
Ki nongshong shnong ba la lamkhmat da u Rangbah Shnong barim, u Bah Tarcius Dkhar na ka por sha ka por ki la phah da ka jingthoh sha ka District Council ba kan tuklar halor kane bad ka Council ruh ka la bthah bunsien ïa u Sordar ka Elaka Laitlyngkot u Bah Allenson Shabong ban pynlong ïa ka elekshon ne ka dorbar ban jied Rangbah Shnong hynrei u la leh bym suidñiew satia ïa kane ka jingbthah jong ka Council.
Ha ka sngi palei, ka kynhun ki nongshong shnong ki la leit ban ïakren bad u Deputy Chief Executive Member (Dy. CEM) ka KHADC u Bah Pynshngaiñ N. Syiem uba peit ïa ka tnad Elaka Administration ba un tuklar mardor ïa kane ka kam bad ïa ka jingleh bym suidñiew jong u Sordar ïa ka jingbthah jong ka Council.
U Bah Tarcius Dkhar u la ïathuh hadien ba ka samoi treikam jong u kum u Rangbah Shnong ka kut ha u snem 2022, la pynlong ïa ka Dorbar ban jied Rangbah Shnong thymmai hynrei u Sordar uba la pynïaid ïa ka dorbar u la kam pynban namar ka jingmih ar kyrteng na ka bynta ka kam ba la tyrwa da ki paidbah kumta yn hap ban pynsangeh noh shwa ïa ka jingpynlong elekshon.
