Shillong, Rymphang, 05: Ka ophis jong u Superintendent of Police ka East Khasi Hills ka la kyrpad ïa ki paidbah ba kim dei ban shah pynngop ne ban sheptieng ïa ki riewshukor kiba pynkam ïalade ba kidei na ki tnat treikam ka Sorkar Pdeng, kum ka tnat Custom, CBI, NCB bad kiwei kiwei tang ban ïoh lute suk ïa ka pisa na ki riewpaidbah ba luilui.
Ha u kyrwoh ba la phah sha ki lad pathai khubor ha ka Lah Sngi u Blei, u Superintendent of Police (City), East Khasi Hills, Bah Vivek Syiem, u la ong, “la ïoh jingtip ba ki don ki riewshukor kiba kam ïalade kum ki nongrah tiar kum ka FedEx bad kiba telephone ïa ki riewpaidbah ban pyntip ba ki don ki tiar ba la poi ha ka kyrteng jong ki tangba kiba don pat ïa ki tiar ba be-aiñ.’
“Nalor kata, ki riewshukor ki donkti ruh ban don bynta lang bad kiwei pat da kaba pyndonkam ïa ka kyrteng jong ki tnat treikam ka Sorkar Pdeng kum ka tnat Customs, CBI, NCB, bad kiwei kiwei ban pyntip sha ki briew baluilui ba ki donkti ban buhrieh ïa ka pisa bymhok bad dei ban pynphai ïa ka pisa sha ka Account da kaba kam ba ka dei ka na ka bynta ka RBI Clearance,” la ong u SP (City).
“Khnang ban pyntieng ïa ki riewpaidbah, ki ju phah da ka jingpyntip ba u lanot u la lah ban shah kem ha kiba bun ki khep. Ha kawei pat ka liang, ki ju phah ban ujor da kaba register online lyngba katto katne ki App kiba dei pynban tang ki shrip bym i don jingsuba eiei. Namarkata, wat ngop ban pdiang ïa kine ki Apps na ki briew kiba phah khlem ithuh,” la maham u SP (City).
“La kyrpad ïa ki paidbah ba kin da pynshisha shwa lada u dei u nombar ba la telephone na ka bynta ki tiar bym shym la thied. La kyrpad ruh ïa ki paidbah ba lada don kum kine ki jingjia, ki lah ban pyntip sha ki Police Station na ka bynta ban pynshisha bad ba ki Pulit kin dup lah ban leh la ka jong ka kamram. Ïa kine ki jingjia, lah ban pyntip ruh sha u Cybercrime Helpline Number 1930 bad sha ka Police Control Room, Shillong ha u nombar 0364-2215427 bad ha u nombar 6009196479,” ong shuh shuh u SP (City).
