KA SORKAR KA PYNKHEIÑ ÏA KA PARA 6A JONG KA 6th Schedule
Shillong, Rymphang, 05: Ka Khun Hynñiewtrep National Awakening Movement (KHNAM) kam don jingpyrshah eiei ruh em halor ka jingtyrwa ka Sorkar Jylla ban pynjlan ia ka samoi treikam jong ka Khasi Hills Autonomous District Council bad ka Jaiñtia Hills Autonomous District Council na ka bynta hynriew bnai lada la leh katkum ki kyndon ba la bthah ha ka Section 6A jong ka Khyrnit Bahynriew.
“Hynrei kane ka jingtyrwa ba mynta ka long pyrshah ia ka Section 6A jong ka Khyrnit Bahynriew kaba kdew shai, “haba ka don ka jingpynbna ia ka Emergency ba kan treikam lane lada ka mih kano kano ka daw, ha ka jingsngew jong u Lat, ka jingpynlong elekshon ka bym treikam, lah ban pynjlan da u Lat ban ym palat ia ka shi snem bad lada jia ba ka jingpynbna ia ka Emergency ka la treikam kam dei ban palat ia ka samoi kaa hynriew bnai hadien ba la pynbna. Namarkata, kumba ka long mynta kam don kano kano ka Emergency bad kam don nongrim hi ruh ia u Lat ban phah pynlong ia ka elekshon ka bym lah ban treikam,” la ong ka KHNAM ha u kyrwoh ba la phah da u Working President Bah Thomas Passah.
“Na ka por sha ka por, ngi la iohi ba ka Sorkar Jylla ka la tuklar ia ka jingtreikam ba laitluid jong ki Council bad ka ladei ka por ban pynneh katkum ka aiñ ia ka jinglong ba laitluid ha ka synshar ka khadar,” la bynrap u kyrwoh.
“Ka jingtyrrwa jong ka Sorkar Jylla ym tang ba ka pynkhein ia ka kyndon jong ka Khyrnit Bahynriew hynrei ka pynduh ruh ia ka hok jong ki paidbah ban jied pynthymmai ia ki nongmihkhmat ha ka por kaba dei. U Lat un hap ban shim ia ka rai bad ngin sa phah ia ka jingthoh sha u Lat bad ban kyrpad ia u ban iada ia ka kyndon jong ka Para 6A jong ka Khyrnit Bahynriew ka Riti Synshar ka ri India,” la ong ka KHNAM.
