Shillong, Naitung 28 : Hadien ka jingjop ka jingshalan ia u sohniamtra (Khasi Mandarin) ha u snem ba la dep, ka tnad ka Rep ka Riang bad Farmer’s Welfare jong ka Sorkar bad kumjuh ruh ka Meghalaya Basin Management Agency (MBMA) dang shen ka la plie ia ka lad khaii kaba haduh 1.3 ton u sohtrun sha ki ri Middle East. Kane ka long shi bynta jong ka jingpyrshang ban weng noh ia ka jingiajngai hapdeng ki nongrep bad ki iew bar ri kiba heh. U sohtrun na Meghalaya la die ha kylleng ki dukan heh jong ka Dubai, Kuwait, Sharjah bad kham kongsan ka long ba bun na ki nongrep jong ngi, ki la ioh ban mad mynta ia u soh ka jingtrei shitom, kata palat arshah ka dor kaba ki ju die baroh shi katta.
Katei ka jingpyrshang ka la wanrah bad long ruh ka jingiarap ia ki nongrep ban ioh ia ka iew kaba neh bad kaba biang kaba pyniasoh lang bad ka iew ha ka ri. Dang ha u snem ba la dep, kumba 40 ton u sohtrun la dep ban shalan sha kawei ka jaka shalan soh kaba don ha Karnataka bad nangtei pat kin sa shalan sha ki ri Europe bad ki iew jong ka North America.
Mynta u snem, katei kajuh ka jaka shalan ka la lah ban pynmih ruh sa kawei ka jaka treikam da ka kali ne ka mobile processing unit, ha Umdihar IVCS, Ri Bhoi District khnang ban dup lah pynmih kham bun bad kumta haduh 23 ton u sohtrun la lah ban pynmih da katei ka unit tang ha ka taiew ba nyngkong jong ka jingtreikam jong ka.
Kitei ki processing unit ki donkam ia u sohtrun ba khia shi kilo shaneng bad kim pdiang ruh ia ki sohtrun kiba rit. Kumta ha ka por kheit soh, baroh kawei ka jaka rep la kheit lut ia ki na ka bynta ban die bad kumta tang ia kiba heh pat la lah ban buh na ka bynta ban die (Grade A) sha kitei ki processing unit.
Kumta kane ka la pynlong pat ia ki nongrep ban sah shibun ki sohtrun kiba kham rit (Grade B). Namar ba kadei ka aiom ba u sohtrun u la ih, kumta ia kitei kiba kham rit la die noh ha ka dor kaba kham tad bad katba lah dor. Ban iarap na ka bynta kine ki soh kiba rit, na ka liang ka sorkar ka la wad shuh ki lad ki lynti kumno ban pyniasoh bad ki nongdie bad kumta dang shen ka la ioh ban iatehlok bad ka Reliance Retail store kiba don ha kylleng ka nongbah Guwahati ban die ia kitei ki soh na Meghalaya. Kumta, da katei ka sienjam, ki nongrep mynta ki la ioh ban die ha ka dor kaba heh arshah na ka dor kaba ki ju die.
Lah ruh ban kdew hangne ba u sohtrun na kane ka jylla u jur bha ha ka jingdon ka shini (brix value of 16-18) bad kham duna ka jingjew. Ia kitei ki sohtrun ha ka jylla la ju rep khlem pyndonkam da kino kino ki kynja dawai, bad kane ka pynlong ban pynduna ia ka jingdon ki kynja khniang ha u soh.
Dei na kane ka daw kaba pynlong ia ki ban lah ban pyniaid iew wat sha ki iew kiba heh shabar ri bad ruh ha ki iew ha ka ri. Hynrei, baroh shi katta pat ia ka iew la bat da ki nongkhaii pdeng lane kita ki middlemen kiba ju ohdor bha ia ki nongrep da kaba siew lypa ia ka mar rep shwa ban kheit ia u soh. Kumta ki nongrep namar kim donlad ban khaii shabar bad donkam ka pisa ha shwa ban kut ka samoi bad ruh shwa ka samoi long skul da ka jingbym banse ki la shim lypa ia katei ka pisa ba ju ai kitei ki nongkhaii pdeng.
Hadien ba la iohi ia ki jingeh ba ki nongrep ka jylla ki mad, na ka liang ka sorkar jylla ka la trei borbah ban plie lad plie lynti khnang ban pynsuk ia ki paidbah ha ki shnong ki thaw. Kine ki jingpyrshang suki suki ki sdang ban wandur. Ka sorkar ka la trei borbah ruh ban lum lang ia ki nongrep bad thaw ia ki kynhun jong ki nongrep ne kita ki Farmer Cooperative ne ki Farmer Producer Organisation (FPO) ha baroh kawei ka jylla bad mynta ki la don palat 350 tylli ki kynhun kiba la dep ban thaw ha kine ki lai snem ba la dep. Na ka liang ka tnad ka Rep ka Riang ka Sorkar Jylla bad ka MBMA ki la kyrshan ia kine ki kynhun khnang ba ki lah ban mihpli lane knieh noh ia ka jaka jong ki nongshim kabu ne kita ki middlemen khnang ba kin lah ban kham pynmih kham bun bad pyniaid iew shuh shuh.
Kum ban shu kdew, ha ka sien phah kaba nyngkong la phah haduh 1.3 ton u Sohtrun sha ki ri Middle East da ka ‘Silchang Dimrimbri Palwa Adling IVCS’ na East Garo Hills District. Kane kadei ka sien kaba nyngkong ba ki nongrep da kawei ka sur ki trei lang ban sdang ia ka jingkhaii shabar ri bad kane ruh ka la urlong da ka jingkryshan lang jong ka Sorkar Jylla bad ka MBMA.
Da ka thong ban kyntiew shuh shuh ia ka iew ka hat na bynta u sohtrun na kane ka jylla, ka sorkar kan pynlong ia ka tamasa sohtrun ha Delhi. Kane ka tamasa kan sa long hadien ba la dep ka jingrakhe Independence Day bad kan plie lad ruh ia ki nong Delhi ban ioh mad ia u sohtrun ba mih na ka jylla Meghalaya.
