Shillong, Jylliew, 09: Ha ka jingrakhe ïa ka World Environment Day, ki nongshong shnong jong ka shnong Lachaumiere ki la mih ban ïashim bynta ha ka jingïaid kjat kaba 2 kilomitar ba la pynlong da ka Dorbar Shnong Lachaumiere ha ka 7 tarik mynta u bnai.
Ha kane ka jingïaid kjat ba la ïaid pyllun ïa ka shnong Lachaumiere la ïashim bynta lang da ka Myntri jong ka Sorkar Jylla ka Dr. Ampareen Lyngdoh kaba long ruh ka MLA jong ka East Shillong Constituency, u Rangbah Shnong u Dr. Aman War, ki nongïalam jong ka seng samla bad ka seng Kynthei lem bad ki khynnah skul ka Loreto Convent,Shillong bad ki samla pule jong ka St. Anthony’s College, Shillong.
Ha kane ka sngi ki paidbah ki la ïashim bynta lang ha ka jingthung ïa ki tynrai dieng kum shi bynta ban pynneh pynsah ïa ka jingjyrngam jong ka mei mariang.
