Shillong, Jymmang 22: Ki riewngeit jong ka Balang Presbyterian ha ka shnong Mupliang ki la iam kthang hadien ba ki thylliej ding barhem ki la bamduh bad pynkylla dpei ia ka ïingmane jong ka Balang Presbyterian ha ka shnong Mupliang, West Jaiñtia Hills District.
Kane ka la jia ha ka step phyrngap sngi balang ha ka por kumba 2:00 baje mynstep bad la suba ba ka jingkem ding jong kane ka Ingmane ba dang shu dep shna dang khyndiat snem ka lah ban dei na ka jingthud jong ki waiar bording elektrik.
U dkhot jong ka Komiti Balang u Bah P. Ryngkhlem ha ka jingiakren bad u nonglum khubor jong ka Batesi Tv u la iathuh ba ka jingjulor jong kane ka Ingmane ka la kot kumba T.1.5 klur eiei.
Shuh shuh u la iathuh ba kum ki bor pyniaid Balang ki la pyntip sha ki Pulit jong ka tnat Pynlip ding, hynrei namarba ka ophis jong ka Fire and Emergency Services Station ka don shaduh Jowai, kumta ka la shimpor bad katba kin da poi ha ka shnong Mupliang ka ding ka la bamduh ia ki jindon jingem jong ka iingmane baroh kawei.
Katkum ka jingiathuh jong u Bah Ryngkhlem, ka Balang Presbyterian Mupliang ka don kumba 800 tam eiei ki riewngeit kiba dei ki dkhot jong ka Balang.
