Shillong, Jylliew, 01: Lai ngut ki khynnah rit ki la khladnoh na kane ka sla pyrthei katba kiwei pat ki dang don mynta hapdeng ka jingshitom kaba jur na ka jingbam ia u tit khlaw ha ka shnong Saphai, kaba hap hapoh ka Laskeiñ C&RD Block, West Jaintia Hills District.
U Superintendent of Police ka West Jaintia Hills Bah Chemphang Syrti u la iathuh ba lai tylli ki longiing na ka shnong Saphai, West Jaintia Hills District ki la kem pang hadien ba ki la bam ia u tit buid. Ia ki dkhot jong kine ki longiing la pynkit noh sha MCH hospital, Jowai da ki bahaing hasem na ka bynta ban ioh jingsumar.
U la iathuh ba ka longing ba nyngkong ba la kempang ka dei na ka iing jong ka kong Jumonlang Suchiang 43 snem ia kaba la pynkynriah noh sha NEIGHRIMS Hospital ryngkat bad u khunrit uba dang 10 bnai kiba don mynta hapdeng ka jingshitom kaba jur.
U Khun jong ka, u heprit Wansalan Suchiang 14 snem bad u heprit Kitlangki Suchiang 10 snem bad ka khun kynthei ka heprit Riwanka Suchiang 8 snem ki la khlandoh ha MCH Hospital, Jowai.
U SP u la ong ba ka longing kaba ar kaba la kem pang ka dei na ka iing jong Ribaitki Shadap, Shanmi Shadap bad Sah Shadap kiba dang don mynta hapdeng ka jingshitom kaba jur bad dang shah suumar MCH Hospital Jowai.
Ka longing kaba lai ba la kem pang ka dei na ka ing u Bah Over Sutnga, ka Anna Suchiang bad Niwanshwa Kanai bad kine ruh ki don mynta hapdeng ka jingshitom kaba jur bad ki dang shah sumar ha MCH Hospital Jowai.
