Shillong, Jylliew, 01: U Myntri ka Sorkar uba khmih ia ka tnat Revenue bad Disaster Management u Bah Kyrmen Shylla ha ka sngi Saitjaiñ u la hiar sha ka shnong Nongpriang, Sohra Civil Sub-Division ban leit sngewlem halor ka jingkhlad noh ki saw ngut na ka ka jingtwa khyndew ha ka iing sah jong ki kaba la jia ha kine ki khyndiat sngi.
La synran ia u Bah Kyrmen Shylla da u MLA ka Sohra u Bah Gavin Mylliem.
U Bah Kyrmen Shylla lehse u lah ban dei u Myntri sorkar ba nyngkong eh ha Meghalaya u ban hiar sha ka shnong Nongpriang, ka shnong kaba ap ban iaid kjat kumba ar kynta eiei.
Ia ka met jong ki saw ngut kiba la khlad noh kata u Bah Phisar Nongrum, ka kong Benti Riahtam, u Bah Kynmaw Sungai bad u Lumlang Riahtam la thang ha ka sngi Saitjaiñ ryngkat ka jingiam briew kaba shyrkhei ha kane ka shnong.
U Bah Kyrmen u la aiti ruh ia ka song pisa ba 4 lak sha ki bahaing hasem jong kine kiba la khladnoh.
