Shillong, Risaw, 06: Ka rilum Garo ka la ïam briew namar ka jingïap briew ka la nang kiew sha ka 15 ngut hadien ba ha ka sngi u Blei la pynthikna sa ïa ka jingïap jong ki san ngut ki briew ba kynthup ïa ki shi kpa shi khun, ka kmie bad ka khun bad uwei u rangbah uba la duhei ïa ka jingim na ka jingkhyllem jong u dieng, na ka jingther jong u lapbah uba la wanrah ïa ka jingshlei um ha rilum Garo.
Ka jingjia banyngkong ka la jia ha ka shnong Dimapara ha ka sngi Thohdieng janmiet, katba u kpa bad u khun ki la shah rong ha ka umsaw katba ki dang pyrshang ban jam ïa ka surok kaba la shah tap ha ka um.
Kine ki arngut ki lanot ki dei kiba la ithuh kyrteng kum u Bijoy S. Sangma, 44 snem ka rta uba dei ruh u nonghikai skul bad u khun jong u, uba la 13 snem ka rta uba la tip kyrteng kum u Wian Chigado R. Marak katba ki dang thmu ban leit phai sha la ing hadien ba la wan phai na skul hynrei ki la sahkut namarba ka surok kaba pynïasoh da ka jingkieng ha Dimapara ka la shah tap ha ka um ha ka wah Bugai. Wat hadien ba ki nongshong shnong ki la maham namar ka jingkhlaiñ shaba palat ki lat lat jong ka um, hynrei u Sangma u la pyrshang ban ñiah beit ïa ka kali Wagon R lyngba ka surok ba la shah tap ha ka um. Ha kum kane ka khyllipmat, ka kali kaba kine ki shi spah shi khun ki shong, ka la shah rong bak ha ka umsaw.
Watla ïa ka kali la lap da ka kynhun State Disaster Response Force (SDRF) ha ka sngi Saitjaiñ, hynrei ïa ka metïap jong u Sangma bad u khun jong u, la lap ha ka sngi kaba bud na kawei jaka ba long them hajan ka shnong Sonagre ha Dalu. Kine ki arngut ki lanot ki dei kiba shong ba sah ha ka shnong Rongkhon Songgital, Tura.
Ha East Garo Hills, ka kmie bad ka khun kynthei ki la duhei ïa la ka jingim na ka jingtwa ka khyndew namar ka jingther jong u lapbah uba jur ha ka miet sngi Saitjaiñ. Ka Amerin K. Marak bad ka khun kynthei ka Manase K. Marak, ki la ngat ha kane ka jingjia ba sngewsih katba ki dang thiah ha la ing ha ka shnong Gongdop hadien ba ka khyndew kaba la twa nalor u lum ka bad hap ha ka ing kaba ki sah ka la tep im ha kine ki arngut. Ki kynhun ai jingïarap lem bad ki nongshong shnong ki la khat ïa ki synrum tad haduh ban ïoh sei ïa kine ki ar tylli ki metïap ha ka step Sngi u Blei.
Sa kawei pat ka jingjia ba sngewsih ka la jia ha ka miet sngi Saitjaiñ haba uwei u rangbah uba la tip kyrteng kum u Thenseng R. Marak, u la duhei ïa la ka jingim hadien ba uwei u diengbah u la khyllem na ka jingpaswut jong ka eriong bad hap ha ka kali kaba u ñiah katba u dang ïaid lynti na Songsak Reserve Forest, ha East Garo Hills. Ha kane ka por, u Marak uba don lang hapoh ka kali bad ki arngut ki bahaing kynthei, u la ïap hashen, katba kine ki arngut ki kynthei ki la mynsaw jur bad la pynkit noh ïa ki sha Williamnagar Hospital hadien ba la ïoh jingsumar ha Songsak PHC.
Ha kawei pat ka jingjia, ki kynhun ai jingïarap ha South Garo Hills ki la bteng ban wad sa ïa ki lai tylli ki metïap kiba la shah tep im na ka jingtwa ka khyndew ha Hatiasia Songma. Kine ki lai ngut ki lanot ki dei napdeng ki hynñiew ngut shi bahaïing kiba la shah tep im ha ka jingtwa ka khyndew kaba la hap ha ka iing sah jong ki ha Gasuapara Block kaba la jia ha ka sngi Thohdieng.
U Commissioner and Secretary jong ka tnat Revenue & Disaster Management Department u Sanjay Goyal u la ïathuh ha nonglum khubor lyngba ka telephone, “baroh ki tnat treikam ki la trei shitom ban ai jingïarap ha kino kino ki jingeh. Baroh ki
Deputy Commissioners bad ki Superintendents of Police ki la peitngor bha ïa ka jinglong jingman. Wat ki kynhun ai jingïarap na ka tnat Pulit ka Jylla, na ka tnat Fire and Emergency Service, ka kynhun SDRF bad NDRF ki dang ïai bteng ban wad ïa ki lanot kiba dang jah rngai. Ngin dang ïai bteng ban ai jingïarap sha ki lanot kiba shah ktah.”
