Jowai, Risaw 08: U lyoh uba dum u la tap ia ka shnong shnong Pynthorlangteiñ kaba hap hapoh ka Thadlaskeiñ Block,West Jaiñtia Hills District hadien ba saw ngut kiba dei shi ïing shisem ki la khladnoh na kane ka sla pyrthei na ka jingtwa ka khyndew kaba la jia ha ka step jong ka sngi u Blei.
Kine ki saw ngut ki kynthup ia u kpa jong ka ïing u Bah Biangki Phawa 29 snem ka rta, ka kmie ka Kong Pynjanai Ryngkhlem 25 snem ka rta, ar ngut ki khun u heprit Edyfy Ryngkhlem 5 snem ka rta bad i heprit Iwadaroi Ryngkhlem 3 snem ka rta.
Katkum ka khubor ba la iohlum la iathuh ba kane ka longïing ka dei kaba ju im kyndoi jakpoh tang kum ki nongshoh maw-ria.
Ki trai shnong ki la iathuh ba ki la ïohi ïa kane ka jingjia ha ka por kumba 5:30 baje mynstep bad marmar ki la leit ban ai jingiarap ban iohsei ïa ki saw ngut kiba la shah tep im ha ka khyndew.
U Mama jong kane ka longïing Bah Hermon Rynkhlem u la pynpaw ïa ka mynsiem kaba dap da ka jingsngewsih bad ka jingsngewkhia halor kane ka jingduh ïa la ki baieid bathoiñ ha kum kane ka jingjia bym poi pyrkhat na ka jinglyngshop jong ki bor ka mariang.
U Bah Ryngkhlem u la kyntu ïa ki bor Sorkar ba kin shimkhia ban leh ïa kaba donkam halor kane ka jingduh jong ki ïa kine ki saw ngut ki mynsiem briew bad iathuh ruh ba u kpa jong kane ka longïing u long tang kum u nongshna mawit bad u nongshoh mawria ryngkat bad ka kmie ha kaba ki ju ïalam lang ia la ki khun ynda la wai skul u khun shynrang manla ka sngi.
Ïa ka met jong kine ki saw ngut yn sa tep ha ka Lah Sngi u Blei ha u Lum jingteng ka Balang Presbyterian, Pynthorlangteiñ.
U Deputy Commissioner jong ka West Jaiñtia Hills District u Bah B.S. Sohliya u la bthah mardor ïa u Block Development Officer (BDO) jong ka Thadlaskeiñ C&RD Block ban leit ai ïa ka song jingïarap pisa sha ki bahaïing kiba don jingïadei bad ki saw ngut ki mynsiem kiba la khladnoh ha ka jingtwa khyndew ha ka shnong Pynthorlangteiñ.
Ka ophis jong u Deputy Commissioner ka la mang 16 lak tyngka sha kane ka longiing.
ïa ka met jong kitei ki saw ngut ladep sei bad la pyndep katkum ki kyndon jong ka aiñ, ong u kyrwoh khubor ba la phah na ka ophis treikam jong u Deputy Commissioner.
