Shillong, Risaw 08: U MP ba marwei ka Rajya Sabha na Meghalaya u Dr. WR Kharlukhi lem bad ki 26 ngut ki nongleit Pilkrim na Meghalaya ki la jam na khappud jong ka Bethlehem, Jerusalem sha Egypt.
U Myntri Rangbah ka Jylla Conrad Sangma u la ong, “kane ka jingpynkynriah ka dei ka jingjop lyngba ki jingtrei shitom jong ka Ministry of External Affairs (MEA) bad ka Indian Diplomatic Mission. Ki nongshong shnong na ka jylla Meghalaya, kiba la sahkut ha ka jingkhie kynsan ka jingïaleh thma hapdeng ka Israel-Palestine, mynta ki la poi sha Egypt.”
“Ngi kham ïoh mynsiem khyndiat ban tip ba la pynthikna ba ki (nong Meghalaya) ki la rung sha Egypt, bad ban pynthikna ba ki nongshong shnong jong ngi kin ym jia eiei kaba sniew. Ki jingmut jingpyrkhat bad ki jingduwai jong ngi kin don ryngkat ha ka jingïaid lynti jong ki bad haduh ba kin da wan phai suk sha la iing,” u la ong.
Haba ïakren lyngba ka telephone na Tel Aviv, uwei na ki nong Meghalaya uba sah ha Israel u la ong, “ngim leilei hynrei ka thma ka la nang jur. Ki shipai ki la nang ïoh knieh biang katto katne ki shnong na ki kynhun kieng atiar, bad lehse sa tang katto katne por baroh kin sa long biang kumba ju long. La bthah ïa ngi ban shong khop hapoh iing bad ban rieh ha ki jaka kiba shngaiñ, bad baroh ki nongshong shnong ki la bud ïa ki jingbthah da ki bor sorkar. Ki nong Meghalaya kin hap ban ïaid lynti da ka jingsynran jong ki shipai lyngba ka Suez Canal kaba shimpor haduh 10 kynta.”
Ka jingïakynad ka la sdang hadien ba ki lehnoh na ka ri Palestine ka Hamas ha ka step jong ka Sngi Saitjaiñ, ki la ther da ki namding ïa ka ri Israel bad ïa ki jaka sah jong ki Jew na ka Gaza Strip ha ka sien banyngkong eh naduh u bnai Jymmang mynta u snem.
Hapdeng kane ka jingjia kaba shyrkhei ha Israel, ki 27 ngut ki nong Meghalaya ki la hap ban shong rieh khop ha Bethlehem. Kine ki 27 ngut ki dei kiba leit pilkrim riewblei sha Jerusalem na Shillong, kiba la mih naduh ka 9 tarik, Nailur. Mynta ki dang sahkut ha Bethlehem, hapdeng ka jinglynga mynsiem ïoh ba ka jingïaleh thma kan nang jur ha kane ka thaiñ.
Halor kane ka jingjia, ka Sorkar Meghalaya ka la ïatreilang ryngkat bad ka Ministry of External Affairs ban pynthikna ba kine ki 27 ngut kin wan phai biang sha Meghalaya da kaba suk ba saiñ.
