Shillong, K’lyngkot, 27: Ryngkat bad ka ri India baroh kawei, ka Jylla Meghalaya ha ka sngi Thohdieng ka la rakhe ia ka Republic Day kaba 75 snem.
Ha kane ka jingrakhe ia ka Republic Day kaba la long ha madan Polo, Shillong la kynmaw burom kyrpang ia ki nongiakhun laitluid jong ka ri India bad kumjuh ruh ia ki khlawait jong ka jaitbynriew, kum u Tirot Sing, u Kiang Nangbah bad u Pa Togan Sangma
U Lat ka jylla Phagu Chauhan uba la long kum u kongsan u la pynher ia ka lama lai rong jong ka ri India bad shim ruh ia ka bynta ban salute ia kiba ia shim bynta ha ka march pass ba kynthup ia ki shipai BSF, CRPF, District Executive Force, East Khasi Hills District, Sikkim Police, 1st MLP Bn, NCC Boys, NCC Girls, Meghalaya Bharat Scouts and Guides, Sacred Heart Girl’s Hr. Sc. School, Brass Band Border Wing Home Guards bad ki Pipe Band Assam Regiment Centre.
U Lat ka jylla u la sam ruh ia ka khusnam ‘U Tirot Sing Award 2024’ na ka bynta ka Arts and Culture sha u Risingbor Kurkalang, ia ka Pa Togan N. Sangma Award 2024 na ka bynta ka Social Service sha ka Dr. Delphine Gare Momin bad ia ka “U Kiang Nangbah Award 2024’ ha ki kam ialehkai sha u Phrangki Buam.
Haba kren kum u Kongsan u Lat ka jylla u la iaroh ia ka Sorkar Jylla kaba la pyrshang ban wanrah jingsuk hapoh ka jylla lyngba ka jingkhot iakren iasuk bad ka seng kieng atiar Hynniewtrep National Liberation Council (HNLC) katkum ka jingbthah jong ka Ministry of Home Affairs (MHA) ka Sorkar Pdeng.
La sam ruh ia ki khusnam Megha Health Insurance Scheme (MHIS) & Pradhan Mantri Jan Yojana (PMJAY) Awards sha ki hospital kiba treikam bha bad kiba la ai ka jingshakri kaba paka ia ki paidbah nongshong shnong.
Ha East Khasi Hills la ai ia ka khusnam sha ka Pomlum PHC bad ka Mawphlang CHC na East Khasi Hills ka la ioh ka khusnam kum ka hospital ba ai jingshakri bapakam tam ha ka jylla.
Ki hospital shimet kiba la shah jied ban ioh khusnam ki long ka Bethany Hospital, Shillong bad ka Bansara Eye Care Centre, East Khasi Hills.
Ka Reid Provincial Chest Hospital, East Khasi Hills District ruh ha kane ka kynti ka la shah pynkup burom da ka khusnam bad ka Ganesh Das Government Maternal & Child Hospital, East Khasi Hills District ka la shah jied kum ka hospital ba paka tam ha ka jingsumar ia ki kynthei bad ia ki khunlung.
Shuh shuh ka Reid Provincial Chest Hospital, East Khasi Hills District ka la jop ruh ia ka khusnam n aka bynta ka Ayushman Bharat Pradhan Mantri Jan Arogya Yojana Quality Certification Hospital.
Ha kane ka sngi, la sam ruh ia ka Police Medal for Meritorious Service (MSM) sha u Superintendent of Police (City) Bah Vivek Syiem, ia u AB-Inspector John M Sangma bad Havildar Bah Teibor Sumer, katba ia ka Home Guards & Civil Defence Medal for Meritorious Service la ai sha ka Kong Aniosca Basaiawmoit kaba dei ka Inspector kaba shakri kum ka Senior Instructor ha Central Training Institute of Civil Defence and Home Guards, Mawdiangdiang.
La pyninam ruh ha kane ka sngi ia ki tabut na ka tnat Tourism, ophis jong ka Deputy Commissioner, na ka DCIC-East Khasi Hills, na ka ophis Superintendent of Fisheries, na ka Meghalaya State Skills Development Society, na ka District Animal Husbandry and Veterinary, na ka District Horticulture, DFO, na ka Social Forestry, na ka NCC, na ka Divisional Soil and Water Conservation bad na ka District Election Officer.
Ka tabut jong ka DCIC-East Khasi Hills ka la jop ia ka nam lahduh, katba ka Meghalaya State Skills Development Society ka la long baar bad ka District Animal Husbandry and Veterinary ka la long balai.Ha ka jingiakob iaid march past, ka NCC Girls ka la jop ia ka nam lahduh, katba ka NCC Boys bad ka Sacred Heart Girl’s Hr. Sc. School ki la jop ia ka kyrdan baar bad balai.
