Shillong, K’lyngkot, 27: Ki khynnah skul jong ka Mission Upper Primary School, Mawryngkneng ki la pyniap biej ia u Lat ka Jylla bad ia ki kynrem ki lyndan lyngba ka sap kilan met kumba ju leh ki shipai hashwa ban leit iakhun ia ki lehnoh ha ka jingrakhe ia ka Republic Day kaba la long ha nongbah Shillong ha ka sngi Thohdieng.
La sakhi ruh ba kine ki khynnah skul, ki phong ia ka Uniform ba la suh da na ki borni bad kieng ruh ia ki suloi ba la shna kyrpang da ki dieng bad pyni ia ka sap kilan met da kaba bud ia ka sur jong ka ksing.
Shwa ban pynkut ia ka jingkilan met, kine ki khynnah skul, ki la pyni ruh ia ka sap iakhun ban pynliem lyndang ia ki lehnoh.
Ynda la wai ka Cultural Programme u DGP ka jylla uba la iap biej shaba palat ia kane ka jinglah jong ki khynnah skul ka Mission Upper Primary School Mawryngkneng ban pyni ia kane ka sap kilan met, u la khot bad shondur ban pynsah jingkynmaw ia kane ka sngi.
Ha kane ka sngi, ka jingrakhe ia ka Republic Day kaba 75 snem jong ka ri India, ha nongbah Shillong la sakhi ba ka long kaba iphuh bad ka iphieng bha da ka jingwan shim bynta shitrhem ha ki jingiakop bapher bapher.
Ha ka jingiakop march pass ka kynhun kaba wan balai la ioh rah da ka Sacred Heart Girls Higher Secondary School bad ka kynhun kaba wan baar la ioh rah da ka National Cadet Corps, Boys bad kaba ioh rah ia ka nam lahduh ka dei ka National Cadet Corps, Girls.
Ha ka jingia pyninam ia ki Tableau ia ka nam kaba lai la iohrah da ka District A.H Veterinary office bad ia ka nam baar la ioh rah da ka Meghalaya State Skill Development Society katba ia ka nam kaba nyngkong la ioh rah da ka District Commerce and Industries Centre.
Ha ka jingiakop ia ka Cultural Programme ia ka nam balai la ioh rah da ka Seng Khasi Higher Secondary School Shillong, katba ia ka nam baar la ioh rah da ka Mission Upper Primary School, Mawryngkneng bad ia ka nam ba nyngkong la ioh rah da ka Multipurpose Secondary School, Mawngap.
Ia ka khusnam na ka bynta kine ki nongjap la sam da u Chief Secretary ka jylla u Bah DP Wahlang bad u Director General of Police (DGP) ka jylla u Dr. Lajja Ram Bishnoi.
