Shillong, Naitung 01: Ki ophisar shipai Border Security Force (BSF) bad Border Guard of Bangladesh (BGB) ha ka Lah Sngi u Blei ki la iakynduh lang ha ka jingialang ‘Inspectors General BSF-Region Commanders BGB Level Border Co-ordination Conference’ kaba la sdang naduh ka Lah Sngi u Blei bad ka ban sa kut noh ha ka sngi Palei kaba la long ha Frontier Headquarter BSF, Shillong.
Ia kane ka jingialang la ju pynlong manla ka ar snem hapdeng ki ar tylli ki kynhun shipai kiba pahara khappud ban iakren ia ki mat bapher bapher kiba iadei bad ka jingmyntoi lang na ka bynta ka jingiada ia ka khappud kynthup ia ka jingiatreilang ban pyrshah ia ki kam runar ruser ha khappud, ban iathir iatai ki kam pynroi kiba dang sahteng ha ka khappud, ban khanglad bad ban iada ia ka jingjam beain ha khappud.
Ha ka jingialang kaba la sdang ha ka sngi ka sngi, ïa ka kynhun jong ki shipai pahara khappud na ka ri Bangladesh la pdiang sngewbha da ki ophisar jong ki BSF ha ICP Dawki bad ha Umpling BSF campus, Shillong.
Ïa ka kynhun shipai BGB na ka ri Bangladesh kaba kynthup ïa ki 13 ngut ki ophisar shipai la khlieh da u Md Shazedur Rahman Additional Director General, uba dei u Region Commander jong ka South East, Chattogram.
Na ka liang jong ki shipai BSF, la khlieh da u Patel Piyush Purusottam Das, uba dei u Inspector General BSF Tripura Frontier ryngkat ki 12 ngut ki dkhot jong ka BSF na Meghalaya, Silchar bad Tripura Frontiers bad ki nongmihkhmat jong ka Ministry of Home Affairs, Ministry of External Affairs bad NCB.
Ha ka sngi pynkut jong kane ka jingialang, yn sa iasoi ruh ia ka Joint Record of Discussion da ki nongialam jong kine ki tylli ki kynhun shipai.
