Shillong, Nailur, 15: Ki paidbah ka shnong Nongtyngur ha ka sngi thohdieng ki la ioh kem ia uwei u Khar Bangladesh uba wan rung tuh sha Ri Khasi da ka jingthmu ban leh ia ki kam sniew.
Hadien ka jingkem ia une u Khar Bangladesh ki bor pyniaid shnong Nongtyngur ki la aiti noh sha ka KSU Nongtyngur Unit ban bishar bad ban leit aiti sha ki bor Pulit khnang ba une u Bangladesh un shah pynshitom katkum ki Lyndon aiñ.
Ka KSU Nongtyngur Unit bad ka KSU South Central East Circle ha ryngkat ka jingiatreilang bad ki bor shnong Nongtyngur ki lah leit aiti noh ia utei u Khar Bangladesh sha ki Pulit ka Pynursla, East Khasi Hills.
Ka jing ioh kem ia utei u Khar Bangladesh ka dei tang hadien ar-sngi hadien ka jingshah pyniap dusmon kawei ka longkmie Khasi na ka shnong Donaskur, East Jaintia Hills ha uwei u nong Bangladeshi uba lah pyniap ia ka ha kawei ka jaka khlaw bad pharia lyngkhot lyngkhai ia ka met naduh ki kti ki kjat bad ot ruh ia ka ryndang bad kane ka jingjia ka la pynpar ñiang khriat lut ia ki paidbah kiba sah ha shilynter ki Khappud Bangladesh
Ka KSU Nongtyngur Unit ka dawa ia ki bor Pulit ban pynshitom tyngeh ia u nong Bangladesh uba rung tuh da ki jingthmu ban leh ki kam sniew ym ban shu pynlait suk kumba lah leh na kawei ka por sha kawei ka por, ong u kyrwoh na u General Secretary ka KSU Nongtyngur u samla Melajied Khongbuh.
