Shillong, Nailur 18: Ka Sorkar India ka la shim ia ka sienjam ba nyngkong eh ban pynshlur ia ki kynthei ban iashim bynta ha ki jingiakob mareh bad mynta u snem 2023 ka la pynlong ia ka jingiakop mareh kaba la tip kum ka Khelo India Women’s League.
Ka Meghalaya Athletic Association ruh ha ka lah sngi U Blei, ka la pynlong da ka jingiakop mareh kaba la iashim bynta tang da ki kynthei, kaba la sdang na phyllaw jong ka Sport Authority of India kaba don ha Nehu. Ia kane ka jingiakop mareh la kaweh lama da ka Kong Bansaralin Dhar kaba dei ka Internatinal Athletes and Asian Medalist kum ka Kongsan ryngkat ka jingdon lang u Secretary ka Meghalaya Athletic Association u Bah Finely Pariat.
Ha kane ka jingiakop mareh ha ka jingjngai kaba 5 kilometer bad 3 kilometer la ia shim bynta haduh 30 ngut ki kynthei.
Ki nongjop ha ka jingiakop mareh na ka bynta 5 kilometer, ia ka nam ba nyngkong la iohrah da ka Barisha Khymdeit ryngkat ka song pisa ba 2500 tyngka kaba la ioh ruh ia ka takma ksiar, katba ka Melibad Kro kaba la wan baar ka la ioh ia ka song pisa kaba 1500 tyngka bad takma rupa bad ha ka kyrdan kaba lai la iohrah da ka Medaroi Biam kaba la ioh khur ia ka song pisa kaba 1000 tyngka bad ka takma rong.
Ha ka jingiakob mareh kaba 3 kilometer ia ka nam lahduh la iohrah da ka Bethyne Grace Makri kaba la ioh khur ia ka song pisa kaba 2500 tyngka bad ka takma ksiar, ka Barihun Kharjahrin kaba la wan baar ka la ioh khur ia ka song pisa kaba 1500 tyngka bad ka takma rupa bad ka Anrisha Klein kaba la wan balai ka la ioh khur ia ka song pisa kaba 1000 tyngka bad ka takma rnong.
