Shillong, Nohprah, 04: Kaophis Commissioner for Persons with Disabilities ha ryngkat ka jingiatreilang bad ka State Resource Centre on Disability Affairs ha ka Lah Sngi u Blei ka la rakhe ia ka International Day for Person with Disabilities phyllaw jong ka State Central Library, Shillong.
Ia ka ‘EMPOWERFEST-2023’ la plie paidbah da u Myntri ka tnat Social Welfare u Bah Paul Lyngdoh ryngkat ka jingdonlang jong u Commissioner & Secretary ka tnat Social Welfare u Pravin Bakshi bad kiwei kiwei.
Haba kren ha kane ka sngi, u Bah Paul Lyngdoh u la banjur ba ka imlang ka sahlang ka dei ban pyniaryngkat kyrdan bad ban pynkuupbor ia ki briew kiba don jingduna ha ki dkhotmet. U la ong b aka Sorkar ka la trei shitom ban phah ia ki jingtyrwa ban shna ia ki lynti iaid ba paka na ka bynta ki briew kiba don jingduna dkhot ha ki ophis sorkar bad ki shlem treikam.
Ha kane ka sngi, ka ophis Commissioner for Persons with Disabilities ka la pynkup burom ia u Director jong ka Sanker Rehabilitation Centre u Dr. Sandi Syiem da ka Champion of Mental Health Advocacy Award bad ia u Carmo Naronha jong ka Bethany Society da ka Leader of Equality Award.
Kiwei pat kiba la shah pynkup burom ha kane ka sngi ki long ka kynhun Meghalaya Blind Women’s Football da ka khusnam Inclusive Sportsmanship Award, u heprit Rupari Nongrum da ka khusnam Inspirational Artist Award, ka St. Edmunds College da ka khusnam Trailblaizer in Accessibility Award, u Sengrang G Momin da ka khusnam Inclusive Media Representation Award bad ka Ibadalin Kharbuli da ka khusnam Literacy Award.
U Myntri ka tnat Social Welfare u la pyllait paidbah ruh ia ka megAbility App naka bynta ki briew kiba don jingduna ha ki dkhotmet.
Ha kane ka sngi, ka ophis District Social Welfare Officer, East Khasi Hills, Shillong ka la pynlong ia kane ka jingrakhe ha ka shnong Mawtap Pyllun, Sohiong C&RD Block.
Ka District Programme Officer, ICDS Cell, East Khasi Hills District ka Kong S. Bang ka la long kum ka Kongsan ryngakat ka jingdonlang jong ka District Social Welfare Officer, East Khasi Hills ka Kong E. Kharchandy, u Rangbah Shnong ka Mawtap Pyllun u Bah R. C. Lyngkhoi, ka Kong B. Kharbuli na ka District Legal Services Authority, East Khasi Hills bad ki nongshong shnong.
La pynlong ruh ia ka medical check up camp ba khlem donkam siew pisa da ka jingiatreilang bad ka Sohiong Community Health Centre.
