Shillong, Nohprah, 04: U President jong ka Khasi Author Society (KAS) u Dr. DRL Nonglait, u la kynthoh tyngeh ia u Myntri Rangbah ka Jylla u Conrad Kongkal Sangma ba u dei tang u khlein la thang, jwat la bam.
Kane ka jingkynthoh jong u Dr. DRL Nonglait ka long hadien ba ka ophis jong u Myntri Rangbah kam shym la phah satia ia ka shithi sha ka tnat Political ba ka Khasi Author Society (KAS) ka ladep phah sha ka Sorkar Jylla khnang ban phah sha u Myntri ka tnat Kam Pohing ka Sorkar Pdeng u Amit Shah ha kaba iadei bad ka jingdawa ban pynrung ia ka ktien Khasi ha ka Khyrnit Baphra jong ka riti synshar ka ri India.
Ha ka jingïakren bad ki lad pathai khubor ha ka Lah Sngi u Blei, u Dr. Nonglait u la kynnoh ruh ba ka Sorkar Jylla ka la shim sting shaba palat halor kane ka jingdawa ban pynrung ia ka Ktien Khasi ha ka Khyrnit Baphra.
“Ka dorkhas ba ngi phah sha ka Ministry of Home Affairs (MHA) ka long kaba kham eh namarba ka jingdawa ka long ban wanrah ia ka Official Bill ha ka dorbar ka ban sa wan. Namarba ka Sorkar India ka ioh por tang ar bnai duna ban shim ia ki sienjam halor kane, imat kam pat long kaba kloi ban leh ia kata,” u la ong.
“Kam (Sorkar India) pat don satia ia ka jingmut ban pynbeit thymmai ia ka Khyrnit Baphra jong ka riti synshar ka ri. Lehse ka jingdawa jong ngi ka long kaba kham eh, kim (MHA) shym la ai ia kano kano ka rai halor kane ka jingdawa,” la iathuh u Dr. Nonglait.
“Ka jingtlot bad ka jingsuki na ka liang jong ka Sorkar Jylla ka dei kawei ka daw. Hadien ba la wan na Delhi, ngi la leit da ka kynhun kaba khlain ban iakynduh ia u Myntri Rangbah, ban dawa ba dei ban pynlong ktien Sorkar noh ia ka ktien Khasi bad ha kajuh ka por ban thoh sha u Myntri ka tnat Kam Pohing ka Ri ban pynkhreh ia ka Official Bill ban pynrung ia ka Ktien Khasi ha ka Khyrnit Baphra,” u la ong bad bynrap, “wat u Myntri Rangbah ruh u la kular ia ngi da kaba shai ban leh ia kata bad ha kaba iadei bad ka shithi kum ka jingkyrshan ia ka jingdawa jong ngi, ngi dawa ban wanrah ia ka Official Bill.”
“U (Myntri Rangbah) la ong ba un leh noh ia kane hapoh kine ki taiew bad u ong ruh sngewbha ban pynkhreh ma phi ia ka shithi bad ngin shu pynbiang tang ia kiba long Official. Ngi la ong ba phin phah ma phi na ka tnat Political bad ngi la leit ai ia ka shithi bad ka jingbuddien ka shithi kam mih satia. Hynrei ynda la telephone ia u PA jong u Myntri Rangbah u ong ba ki dang peit ban pynbit pynbiang ia ka shithi. Ka long thik kumba ong, “khlain la thang, jwat la bam.” Kane ka dei ka jingleh suki na ka liang jong ka Sorkar Jylla,” la kynthoh u Dr. Nonglait.
“Namarba ka KAS ka dei kaba im sngi ia kane ka kam, ngim don ka jingdiaw mynsiem hynrei ngin sa shim da kawei pat ka sienjam ban iaid shakhmat ban pynjur ia ka jingdawa jong ngi,” la kren heh mynsiem u Dr. Nonglait.
Haba kylli, hato ka jingpynslem jong u Myntri Rangbah ka dei neem namarba u ap lang ban leh ia ka ktien Garo, “ngam lah ban ong eiei hynrei u Myntri Rangbah u tip ia kata.”U la iathuh ruh ba ka KAS kan sa khot ia ka Central Executive Committee bad hadien ia kata ia ka General Meeting ban pyrkhat ia kiei ki kam ban leh nangne shakhhmat bad ka jingiatreilang kam dei shuh tang ha Meghalaya hynrei ban iatreilang bad kiwei pat ki kynhun na kiwei pat ki jylla kiba dawa ban ioh jingithuh ia ka ktien ha ka Khyrnit Baphra.
