Shillong, Nailur, 07: Ka kynhun State Disaster Response Force ha ka sngi Saitjaiñ ka 7 tarik Nailur, 2024 ka la ïoh sei ïa ka metïap jong uwei u khynnah uba la ngam jyllop ha wah umïam ha ka shnong Nonglum Mawiong, Ri Bhoi District.
U kyrwoh ba la phah da u Public Relations Officer jong ka Directorate of Civil Defence & Home Guards, Meghalayau Bah PH Shylla u la pyntip hadien ba ka kynhun SDRF ka la ïoh jingtip ïa kane ka jingjia na ki Pulit ha ka miet sngi Thohdieng, marmar ki la hiar sha ka jaka ba u khynnah u la ngam jyllop bad ki la sdang ban wad ïa ka met ïap naduh ka por 10:30 baje mynstep.
Ka kynhun SDRF ba la lamkhmat da u Inspector Transly Tynsong ka la lap ïa ka metïap jong u khynnah uba la tip kyrteng kum u Biki Makri uba dang 10 snem ka rta ha ka por kumba 10:45 baje mynstep.
Une u khynnah u dei u khun jong ka kong Jantilin Makri uba shong basah ha ka shnong Nonglum Mawiong Ri Bhoi District. Ïa ka met ïap la aiti noh sha ki bor Pulit ba kin leh ïa ki jngdonkam katkum ka aiñ bad hadien kane la aiti noh sha ki bahaing hasem ban pyndep ïa ka jinglehniam kaba khatduh.
