Shillong, Jymmang, 24: Ka Khasi Hills Autonomous District Council (KHADC) ha ka sngi Thohdieng ka la sam ïa ki Certificate bad ïa ki Identity Card sha ki nongsumad dawai Khasi.
Ka jingsam ïa ki syrnot sha ki 24 ngut ki nongsumar dawai Khasi kiba la ithuh da ka Council ka long katkum ka KHADC (Protection and Promotion of Khasi Traditional Medicines) Act 2011.
“Ka ri jong ngi ka bun bha ki nongsumar tynrai hynrei ki don ruh kiba shu pynbud tynneng ïa kiwei. Kane ka jingithuh jong ka District Council ban pynkupbor ïa phi ban nang pyntbit shuh shuh ïalade bad ha kajuh ka por ban ïai bteng ïa ka rukom sumar tynrai dawai Khasi ha kane ka jylla,” la ong u Chief Executive Member (CEM) jong ka KHADC u Bah Pynïaid Sing Syiem haba kren ha ka jingïalang kaba lyngkot.
