Shillong, Jymmang 24: Ka Khasi Hills Autonomous District Council (KHADC) ha ka sngi Thohdieng ka la rai ban ym shah shuh ïano ïano ruh ban sah miet ha ki dukan ha Iewduh.
Ka KHADC ka la shim ïa kane ka rai hadien ba ka la ïoh pdiang ïa ka jingujor ba ki dukan ha Iewduh ki la kylla long ki ingbasa jongno re jongno.
La shim ïa kane ka rai ha ka jingïalang ba la mihkhmat da u Syiem jong ka Hima Mylliem u Ainam Manik Syiem bad ki nongïalam jong ka Hynniewtrep Iewduh Association (HIA).
Ha ka jingïakren bad ki lad pathai khubor u Chief Executive Member (CEM) jong ka KHADC u Bah Pynïaid Sing Syiem ula ïathuh ba ka jingïalang ka la rai ba ki dukan ha Iewduh ki dei ban khang noh naduh ka por 10:00 baje manla ka miet.
U la pynpaw ruh ïa ka jingsngewkhia halor ka jingdon jong ki briew kiba sah beain ha Lum Survey, kiba la shah kyndang ha ka Hynñiewtrep Youths Council (HYC) ha ka sngi Palei.
“Ban khanglad ïa ki briew kiba sah miet ha ki dukan ba don ha Iewduh, ka jingïalang ka la rai ban ym shah shuh ïano ïano ruh ban sah ha ki dukan,” ong u Bah Pynïaid.
U la kubur ba ki don katto katne tylli ki dukan kiba buh da ki briew ban sah miet ha la ki dukan na ka bynta ban peitngor ïa ki dukan, ïoh ki shah kyndang ha ki runar kiba shim kabu ïa ka jingdum jong ka miet khamtam na ka jingjyllei shaba palat ki nongtuh nongthiem.
“Ïa ki briew kiba la ïoh jingbit ban sah miet ha ki dukan, ka Council ka la rai ban phah mih noh ha lane shwa ka 1 tarik Jylliew 2024,” la ïathuh u CEM.
U CEM u la pynbna ba ka jingïalang ka la rai ban phah 10 ngut ki Pulit Enforcement jong ka District Council na ka bynta ban ïarap ïa ki Pulit jong u Syiem ka Hima Mylliem ban pahara manla ka miet khnang ban lait na ka jingshah tuh bad shah prong ki dukan ha Iewduh.
“Ngi la shim ïa kane ka rai na ka bynta ban tehlakam ïa ki kam runar ruser kiba lah ban jyllei ha Iewduh naduh, ka khalai, ka jingjyllei u drok bad kiwei kiwei ki jingsniew. Na ka liang jong ka Executive Committee kan sa pynmih da ka hukum sha ka Hima Mylliem ban pynthikna ba kan ym don shuh ka jingsah miet jong ki briew ha ki dukan ha Iewduh,” la bynrap u CEM.
