Shillong, Lber, 04: Ka Khasi Students’ Union (KSU) lyngba ka Education Cell ha kane ka kynti ka la pynpaw ïa ka jingsngewkhia kaba jur ïa ka jingbym kheiñ snep ka Sorkar ïa ki samla pule kiba dei ban ïakhun ïa ka examine Central University Entrance Test (CUET) manla u snem.
Ha u kyrwoh ba la phah da u Education Secretary ka KSU u samla Pynkmenlang Sanmiet u la ong, “ka jingpynngat Centre thoh eksamin ïa ki samla pule jong ngi shabar na ka jylla manla u snem, kam dei shuh ka jingbakla hynrei ka la dei ka jingleh khnang da ka jingbym kheiñ snep, jingkheiñ pohdor, ka jingleh matlah bad buh shadien ïa ka jingkordor jong ka pule ka puthi.”
“Manla u snem, ka seng ka ju ïai kren, ka ju ïai phah da ki shithi sha ka Sorkar ban pyntip ïa kane ka kam ba da ki hajar ngut ki samla pule ka jylla ki hap ban leit shabar na la ka jong ka jylla tang na ka daw ka jingbym kheiñ snep jong kane ka Sorkar ïa la ki khun samla. Hynrei ka seng bad ka jylla hi baroh kawei ka la ïohi shai na ka snem sha ka snem ba kane Sorkar ka long kaba mutlop da kaba leh kyllut bad matlah ha kaba ïadei bad ka pule puthi pynban kaba ju pynlut por ban pynleit jingmut tang ïa ki kam tamasa ki bym wanrah jingmyntoi eiei ïa ka lawei ki samla jong ka jylla,” la ong u kyrwoh.
“Ka seng ka sngew ban ong ba lada dei shisha ka sien ba nyngkong, lehse ngi lah ban ong ba ka don ka jingduna hangne hangtai, hynrei naduh ba mih ka CUET haduh mynta, ban shu matlah sah te kam lah ban long. Hato matlah u Education Minister ne matlah ki Officer?” la buh jingkylli ka KSU.
Lyngba kane ka kyrwoh ka seng ka kyntu bad dawa mardor ïa ka Sorkar ban pynbeit bad pynbiang shisyndon ïa ki jaka thoh exam CUET hapoh ka jylla kumba kiwei ki jylla ki pynbiang ïa la ki samla pule,” la bynrap shuh shuh u kyrwoh.
