Shillong, Jymmang 07: Ka jingialang jong ka High Level Committee bad ka Harijan Panchayat Committee (HPC) ha ka sngi Baar ki la shim ia ka rai ban iakynduh biang ha ka 7 tarik, Jylliew, 2024 na ka bynta ban shim ïa ka rai ba khatduh ha kaba iadei bad ka jingpynkynriah ïa ki 342 tylli ki longïing na Them IewMawlong.
Ia kane ka rai la shim ha ka jingïalang ba la pynïaid da u Chairman jong ka High Level Committee Bah Prestone Tynsong uba dei ruh u Symbud Myntri Rangbah ka Jylla uba khmih ia ka tnat Kam Pohing.
Haba kren sha ki lad pathai khubor hadien ba la wai ka jingialang, u Bah Prestone ula ong, “ha kaba khatduh, mynta ka sngi ngi la ïakren ïa ki katto katne ki mat ba kongsan kaba ïadei bad ka jingpynkynriah ïa ki longing na Them Metor. Namar hap sngewthuh shisien ba ngi la rai ban pynkynriah ka mut ka dei kaba shirta, kumta ngi la ïakren ïa katto katne ki mat bad ki (HPC) la pyni ba ki long kiba kloi”.
U pyntip ba ka HPC ka la kyrpad ïa ka Sorkar Jylla ba kan ailad ïa kiba kin leit ïakren ïa kaei kaba mih na kane ka jingïalang bad ki briew kiba sah ha Them Metor hashwa ba kin wan biang sha ka jingïalang kaba khatduh halor kane ka kam.
“Hadien ka jingkyrpad jong ka HPC ngi la rai ban ai por sa shibnai ba kin leit bad ïasyllok bad ïakren bad ki longïing bad ha ka 7 tarik Jylliew, ngin sa ïakynduh biang bad ngin sa shim ïa ka rai kaba khatduh.”
U la pyntip ruh ba u Director ka tnat Urban Affairs bad u Chief Executive Officer (CEO) ka Shillong Municipal Board (SMB) ki la shong bishar bad pynthikna mynta ïa ka jubab RTI jong ka SMB ba la ai sha ka HYC ba ong ba ki don tang 194 ngut ki nongtrei Sorkar napdeng ki 342 tylli ki longïing kiba don ha Them Metor.
Kane ka la mih hadien ka jingdawa jong ka HYC ban shu kyndang ïa ki 148 tylli ki ïing kiba shong beaiñ ha Them Metor, Them ïew Mawlong katkum ka jingshem na ka RTI.
U Chairman u la ong ba ka Sorkar ka dang ap ïa ka tnat Urban Affairs bad ka SMB ba kin pyndep ïa ka jingbishar ha ka ban pynthikna ïa kane ka RTI.
U la ong ba namarba ka don ka jingpluh ding kaba shyrkhei ha ki snem kiba mynshwa kumta namar kane ka jingjia, u Director ka Tnad Urban Affairs ha u snem 2008 bad 2009 ula ai jingbthah ïa ka MUDA ban pynlong biang ïa ka survey ba thymmai ha ka jingïadonlang kito ki longïing ha Them Metor, ïa kaba kila dep leh.
“Kumba nga ong, haba pynshong nongrim ïa ka RTI ba jubab da u CEO ka SMB, ngam pat lah ban ong eiei ïa mynta namar ka MUDA bad Director ka Urban Affairs ki dang shong bishar ban pynthikna ïa ka RTI,” bynrap u Chairman.
Haba kylli, u Symbud Myntri Rangbah ula ong ba ka Sorkar Jylla kam lah ban kynthup lang ha ka ban ai jaka sah ïa ki briew ba shu shong beaiñ haba pynbeit ïa kane ka kam kaba la sahteng la slem bha.
Ha kajuh ka por, u Symbud Myntri Rangbah ula ong ba ka Sorkar ka la ïeng skhem ha ka rai ban pynkynriah ïa ki 342 tylli ki longïing na Them Metor, Them ïew Mawlong.
