Shillong, Risaw, 25: Ka Sorkar Jylla ka la rai ban shim rai khatduh halor ka jingdawa ban pynkynriah ïa ki 342 tylli ki longiing na Them Iew Mawlong shwa ban kut une u snem.
Haba pyntip ïa kane ha ka sngi Thohdieng, u Bah Sniawbhalang Dhar uba dei u Symbud Myntri Rangbah ka Jylla uba khmih ïa ka tnat Pynroi Sor u la ong, “phi tip bha ba nadong shadong ladep ban pynkhreh (da ka Sorkar). La kumno kumno ngi lah ban shim ïa ka rai khatduh shwa ban kut jong u Naiwieng.”
“Kyrmen, lada ym dei ha u Naiwieng hynrei ha kaba kut jong une u snem, ngin sa shim ïa ka rai kaei kaba ngi dei ban leh kum ka Sorkar (halor kane ka mat),” u la bynrap
U Bah Dhar u la ong ba ka Sorkar ka dang ap namarba ka la don ka jingkyrpad na ka kynhun jong ka Harijan Panchayat Committee (HPC).
Halor ka rai jong ka Sorkar ban phah jingthoh sha ki bor shipai ban ai jaka na ka bynta ban pynkynriah ïa ki briew na Them Iew Mawlong, u Symbud Myntri Rangbah u la ong, “ngam kren shaphang ka Defence. (Ki) kwah ïa ka jaka jong ka Defence hynrei ka jaka jong ngi ka la don lypa katkum ka Blueprint. Ki dang don sa katto katne ki jingïathir kiba dang sah shwa ba ngin shim rai khatduh halor kane ka bynta.”
U la ong shuh shuh, ka Sorkar kan pynbeit ïa ka jingpynkynriah katkum ka la leh ha ka Blueprint.
“Haoid, ngi ïaiban beit katkum ka Blueprint ba ngi la pynkhreh. Namar ka don ka jingïakren bad ki don katto katne ki bynta ba dang sah, ngi dap ap sa ïa kata. Hynrei ngi kwah ban khylliap noh ïa kane ka lynnong lada ym dei ha u bnai Naiwieng hynrei ha kaba kut jong une u snem,” la bynrap u Bah Dhar.
Haba kylli, u Bah Dhar u la ong ba ka jingkyrpad ban pan jaka na ka Defence ka dei kaba la ai jingmut da ka HPC.
“Ka dei ka jingai jingmut jong ki (HPC). Lada ngi ïoh kan bha shaba palat, hynrei balei ngin shu ai ïa ka jaka lajong,” u la ong shuh shuh bad bynrap, “ngi dang khmih bniah. Lada jia ba ngi ïoh ïa ka jaka na ka Defence, ngim donkam shuh ban dang ai da ka jaka jong ka Sorkar. Khatduh, lada ngi ïoh ïa ka jubab na ka Defence bad kam don jaka, ngin hap ban ïaid shakhmat ban ai da ka jaka jong ka Sorkar.”
Katkum ka jingong jong u, ka jaka sokrar katkum ka jingpynkhreh ïa ka Blueprint ka heh kumba 2-3 akar.
