Shillong, ïaïong, 06: Ka jaka ba buh ia ki pipe um plastik jong ka tnat PHE kaba don ha ka shnong Lumshyiap, Shillong hajan ka jaka thang metiap brierw jong ka Seng Khasi, ka la kem ding ha ka noh phai sngi jong ka sngi Saitjaiñ ha ka por kumba 3:45 ne 4:00 baje eiei. Ka jingpluh jong ka ding ka la long kaba ishyrkhei bha kat haduh ba ka la pynher syrngiew ruh ia ki briew kiba sah marjan bad kane ka jaka namarba ka lyer ruh ka jur bha ha kane ka sngi.
Katkum ka jingiathuh jong ki dkhot ka Seng Samla Shnong Lumshyiap kiba ju iaid pahara sha jaka ka jaka ba kham kynjah bad kaba kham long pajih na ka shnong, ki la ong ba ka jingpluh jong kane ka jaka ba ju buh ia ki pipe um plastik jong ka tnat PHE la suba ba ka lah ban dei ruh na ka jingthang khlaw kaba ju jia khah khah ha kane ka bynta kaba don markhap bad ka ‘law syiem.
Kat haduh ba la pynmih ia kane ka khubor ym pat lah satia ban ioh jingkhein ia ka jingjulor. Ha kaba iadei bad kane, ki kali pynlip ding jong ka tnat Fire and Emergency Services (F&ES) tang shu ioh jingtip ia kane ka jingjia ki la leit marmar ban tem ia ka jingklang jong ki thylliej ding barhem.
Ki Pulit ruh ki la wan poi ha kane ka jaka ban pynlong ia ka jingtohkit halor kane ka jingjia.
Ia ka khubor kaba bniah ngin sa wanrah shuh shuh kham hadien.
