Shillong,ïaïong 05: U President jong ka Indian National Congress (INC) u Mallikarjun Kharge ryngkat ka jingsakhi lang jong ki Nongialam ka All India Congress Committee (AICC) u la pyllait paidbah ïa ka Manifesto kaba don shi khung ki jubanlak ban leh na ka bynta ki paidbah nongshong shnong ha ka ri India lada ka Congress ka iohbat ia u lakam synshar hadien ka elekshon Lok Sabha ka ban sa long ha 19, ïaïong, 2024.
Ki jubanlak kiba ka Congress ka la khlei paidbah ha kane ka ilekshon sha Lok Sabha ka long ban wanrah ia ka jinglong kaba mar ïa ryngkat, ban ïada ka jinglaitluid ki niam bad ïa ki ritpaid, ban kyntiew ïa ki samla, ka jingaibor shuh shuh ïa ki kynthei, ki khun kynthei, na ka bynta ki nongrep bad ïa ki kynhun ba im na ka kam tong dohkha bad kum juh na ka bynta kiba trei kam bylla.
Ka Congress ka kular ruh ban ïada ïa ka riti synshar jong ka Ri India, ban pynneh pynsah ïa ka synshar paidbah, ban pynbha biang ïa kaba la pynsniew, ki lad pathai khubor, ki ïing bishar, ka jingïaleh ïa ki kam bamsap, ban pynneh pynsah ïa ki riti dustur.
Kiwei kiwei ki bynta kiba la kdew ha ka kular ilekshon ka long ban kyntiew ïa ka ïoh ka kot ka Ri, ka jingïaburom ïa ka jingsynshar hapdeng ka Sorkar Pdeng bad ki Sorkar Jylla, ban ïada ia ka Ri bad ban ïada ïa ka mariang. Ka jubanlak ka don haduh 54 sla.
