Shillong, Naitung 08: Ka Employment Monitoring Cell jong ka KSU ha ka Lah Sngi U Blei ka la iakynduh ia u Dean jong ka College of Post Graduate Studies in Agriculture Sciences, Umiam ban pan jingpynshai halor ka jingpyllait ia ka post Library Assistant.
Katkum ka Advertisement ba lah pynlait ha 30.10.2023, ki don ar tylli ki post ba lait na bynta ka post Library Assistant, kawei na bynta ka Unreserved Category bad kawei na bynta ST category ha kaba la shem ba na ki 23 ngut ki Short Listed Candidates ym don satia ka kyrteng jong ki samla na ka Khasi-Jaiñtia category watla ki la plai ia ka kam.
Na ka liang jong u Dean ka College u la pynshai ba ki samla Khasi kiba aplai ia kane ka kam ki dei kiba pyndep ia ka Bachelor Degree da kiwei pat ki jingpule bad ki leh ia ka Master jong ki ha ka Library & Information Science bad katkum ka Ordinance jong ka Central Agricultural University (CAU) ba lah pyllait ha 18.10.2023, ki nongthepkam na bynta ka Library Assistant ki dei ban pyndep ia ka Bachelor Degree ha Library & Information Science.
Ka Seng ka la pynsngew ha u Dean ba ha ka jylla Meghalaya, ym pat don ka Bachelor Degree na bynta ka Library & Information Science bad kane ka dei kawei na ki daw ba ki samla ka jylla kim shim iohlad ban pyndep ia kane ka jingpule.
Ka Seng ka la dawa ban pynsangeh shwa shipor ia ka jingthep kam na bynta ka Library Assistant katba kam pat iohlad ban mudui ban pynkylla ia kane ka Ordinance ban ailad ia ki samla Khasi ban ioh thepkam ha kaba iadei bad kane ka bynta.
