Shillong, Nailur 23: Arngut ki samla lud na ka thaiñ Mawngap, East Khasi Hills District ïa kiba la tip kyrteng kum u Wanboklang Kurbah, 20 snem ka rta na ka kyntoit Traw Saitkhlieh bad ka Phibankyntiew Sun, 18 snem ka rta na Marbisu ki la jah rngai na la ïing naduh ka 20 tarik mynta u bnai.
U samla Wanboklang u la jah rngai ha ka por 5:30 baje janmiet bad la ïohi khatduh ïa u ha surok By-Pass ha Traw Lwai. Ki bahaing hasem ki bym shym la lap dien satia ki la ujor da ka ejahar sha ki Pulit jong ka Mawngap Out Post bad ki la kyrpad ruh ba lada don kino kino kiba ïohi ïa u Wanboklang kin telephone ha u nombar 9612679072.
Katba ka samla Phibankyntiew ka la jah rngai ha ka por 4:00 baje eiei janmiet. Hadien ba ki bahaïing hasem kim shym la lap dien satia wat hadien ba la wad kylleng ka shnong ka thaw, ki la ujor da ka ejahar ha Mawngap Out Post. Ki bahaïing ki la kyrpad lada don kino kino kiba ïohi ïa kane ka samla kin sngewbha ban telephone ha u nombar 9612952398.
Hapdeng ki jingsngewsih kthang bad ki jingjawummat ki bahaïing hasem ki la kyrpad ïa kine ki arngut ki samla lud ba kin wanphai noh sha la ing.
Kat haduh ba la pynmih ïa kane ka khubor, kine ki arngut kim pat shym la wanphai satia sha la ïing. “Naduh mynshisngi (20 tarik Nailur 2023) ha ka por ba la wai skul naduh ba la wan sha iing, ngi la telephone na iing. Ha kaba shisien ngi dang ïoh ban ïakren bad naduh ka por 5:30 baje watla ngi la pyrshang ban ïakren lyngba ka telephone ngim shym la ïoh shuh ban kren ïa i. I khlem kren ïano ïano ruh, i shu wan beit shu leit beit,” ong ki bahaing hasem jong samla Phibankyntiew Sun.
“Ngi la leit wad sha Marpna bad shaduh Mairang, ngim lap satia. Ngi la kylli kut ki dukan hynrei ym don satia ba ïohi,” la ong ka hymmen jong ka Phibankyntiew. “Ngi la leit wad ruh sha Damsite ruh ngim lap satia,” ka la bynrap.
“Ngi kyrpad, ba in wan noh sha la ing bad lada i don kano kano ka daw ruh in ïathuh kein ïa ngi ki hymmen ki para bad khamtam ïa i kmie. Ka la pynkulmar ïa ngi ha ïing hasem namar ba na kano ka daw ruh ngim tip i shu leit bad mynta ngin ïawad shano ruh ngim tip bad ka mobile phone ruh ka la lip,” la ong shuh shuh ki bahaïing.
“Ngi dap da ka jingsngewsih. Ka la pynkulmar ïa ngi ha ïing. Kat shaba phi don, sngewbha seh ieid wan noh sha ing lada ma nga kum ka hynmen nga kren wan noh sha iing,” la kyrpad ka hymmen ïa la ka para.
“Ngi kyrpad ïa kino kino kiba ïohi sngewbha ba kin pyntip ïa ngi ki bahaing hasem. Phibankyntiew, lada phi don shano shano ruh, wan phai noh seh,” la kyrpad u Mama da ka jingjaw ummat.
U la ïathuh ba kane ka pyrsa jong u, ka leit beit sha skul kumba ju long bad wan phai ruh sha iing ynda la wai skul hynrei kaba pynlynngoh pat ïa ka ing ka sem ka long ba ka samla Phibankyntiew ka la shu jah la ka jah na la ïing khlem tip satia ïa kino kino ki daw.
