Mairang, ïaïong 15: U Bah Estar Lyngdoh uba dei u Kurim jong ka Kong Ebina Kharbani, ba shong basah ha ka shnong Nonglait, Eastern West Khasi Hills District u la jahrngai naduh ka 9 tarik, Iaiong, 2024 hadien ba u la mih na la ing naduh kane ka sngi.
Ka Dorbar Shnong Nonglait tang shu ioh jingtip halor kane, ka la lum kyrkieh ia ka dorbar ha ka 10 tarik Iaiong, 2024 bad ka la rai ban pynlong ia ka jingwad shnong ha ka 11 tarik Iaiong, 2024 hynrei ym shym la lap dien satia ia u Bah Estar Lyngdoh uba la don mynta la 63 snem ka rta.
Kumta ha ka 11 tarik, Iaiong, 2024 ka Dorbar Shnong ka la iarap ban mudui da ka ejahar ha ki Pulit jong ka Mairang Police Station da ka jingkyrpad ia ki Pulit ban wad lem ia u Bah Estar uba dang jah rngai haduh kine ki sngi.
Katkum ka jingpyntip jong ki bahaïing hasem, la iathuh ba u Bah Estar u don ia ka durkhmat kaba lieh, saw sniehdoh, u phong da ka sopti thohlieh, jyrngam, ka sopti shirt ronglieh, ka jaket potoi saw iong, ka patlun tracksuit rong iong, u kup da ka tupia saiwul rong jyrngam bad u phong da ki slipar rongiong. Une u rangbah u dei uba don ia ka rynieng kaba jrong 5 phut 3 inshi.
Ki bahaïing hasem ki la kyrpad ia kino kino kiba iohi ne lap ia u Bah Estar ba kin sngewbha ban pyntip ha u mobile no 6009597161/8787405568.
