Shillong, ïaïong 15: Haduh 1634 ngut ki nongshad shynrang bad kynthei ki la iashim bynta ha ka Shad Suk Mynsiem kaba lai sngi kaba la kut noh ha ka Lah Sngi u Blei. Na kine, 813 ngut ki nongshad ki dei ki shynrang bad 821 ngut ki dei ki kynthei.
Ki nongïalam jong ka Seng Khasi, Kmie ki la pynpaw ba donkam ban ïaid katkum ka juk mynta hynrei ym dei ban klet pat ïa ka jinglong tynrai namar lada klet, ka jingim jong u briew kam don jingmut.
Ha kane ka Shad Suk Mynsiem kaba 113 snem ba la pynlong da ka Seng Khasi Seng Kmie ha lympung Weiking la sakhi lang da ki byllien ngut ki paidbah na kylleng ka Bri u Hynñiewtrep u Hynñiewwasa.
ïa kane ka Shad Suk Mynsiem kaba lai sngi la pynlong manla u snem da ka Seng Khasi, Kmie kum ka dak ban ainguh aidem ha U Blei Trai Kynrad halor ki jingkyrkhu ba u la theh sei bad ruh ba un ïai theh sei sha u khun bynriew.
U Vice president ka Seng Khasi Seng Kmie u Bah BS Rumnong haba kren ha kane ka sngi u la ong, wat hapdeng ka jingther jong u slap naduh ka sngi U Blei, hynrei ki nong shad shynrang bad kynthei ki la ïa tuid sha lympung Weiking ban iashim bynta ha ka jingshad.
“Kum ba ju long manla u snem, ka jingiashim bynta ki nongshad ka ïai kiew bad mynta u snem wat hapdeng ka jingther u lap bah, u phria bad lyer ba jur bad ka jingsniew ka suiñ bneng, kane kam shym la pynduh mynsiem ïa ki nongwan shad bad ïa ki nongwan peit kai,” la ong u Rgh BS Rumnong.
U la ong, “ka Shad Suk Mynsiem kadei ka khubor ban don ka jingngeit kaba bha ha baroh ki khep bad ban kmen ka mynsiem ïa kaei kaei kaba u Blei Trai Kynrad ula theh.”
