Shillong, Rymphang 20 : Ka jingmih pisa na u kwai ha kine ki saw snem kiba la leit noh ka la jan kot sha ka shi hajar klur tyngka. Kane ka long katkum ka jubab jong ka myntri ka tnat ka rep ka riang ka Dr.Ampareen Lyngdoh ha iing Dorbar Thaw-ain ka jylla kaba long ha ka 20 tarik u rymphang, 2024.
Haba jubab ia ka jingkylli ba la wanrah da u MLA ka UDP na Amlarem konstitwensi u Bah Lahkmen Rymbui, ka Dr.Ampareen ka la iathuh ba ha ki saw snem ba la leit ka jylla ka la lah ban pynmih shi lak ar phew phra hajar shispah lai phew wei metric ton u kwai kata 24,032 Metric ton ha u snem 2019-2020, 24,059 Metric Ton ha u snem 2020-2021, 28,390 Metric ton ha u snem 2021-2022 bad 51,650 Metric Ton ha u snem 2022-2023.Ka jingmih na u kwai ka long 173.03 klur tyngka ha u snem 2019-2020, 235.65 klur tyngka ha u snem 2020-2021, 203.30 klur tyngka ha u snem 2021-2022 bad 382.72 klur tyngka ha u snem 2022-2023. Ka jingmih baroh ha ki saw snem ka long 994.2 klur tyngka.
Ka Myntri kaba peit ia ka rep ka riang ka la iathuh ruh ba ka sorkar ka la ai 46 tylli ki Processing Unit kum ki sem ban trei ban ktah, ki mashin ban khoh kwai bad kiwei pat ki jingdonkam ha ki 21 tylli ki Block ha ki 10 tylli ki District. Ka jinglut na bynta kine ki jingiarap kiba ka sorkar ka la ai ka long 14.06 klur tyngka.
Ka la iathuh ba ka sorkar ka tip ba ki don ki kwai kiba bam khniang ha ki katto katne ki bynta jong ka jylla, kumta ka la dep ban ai jingiarap da kaba sam da ki symbai kait bad symbai sohtrun sha ki 3581 ngut ki nongrep ba kin lah ban pynmih bujli ia ka jingduhnong jong ki na ka daw ka jingbam khniang ki dieng kwai. Nangta ka sorkar kan synreit dawai ruh ia ki dieng kwai khnang ka jingbam khniang kan ym pur sha kiwei pat ki tynrai.
