Shillong, Nailur, 22: Na ka jingñiah stet shaba palat kawei ka Scooty kaba don ïa nombar ML05 T 4679 ka la leit rung shapoh nala kaba don harud ka surokbah National Highway-6 ha Ribhoi District.
Kane ka la jia ha ka noh phai sngi Lah Sngi u Blei ha ka shnong Dulongnar bad la suba ba ka dei na ka jingpynher stet shaba palat u nongñiah kat haduh ba um lah shuh ban synshar ïa u lakam.
Kiba sakhi ki la ïathuh ba ka Scooty ka dei kaba dang wan na Shillong da ka jingthmu ban leit sha Nongpoh hynrei ynda la poi ha Dulongnar na ka jingpynher stet palat ka Scooty ka la rung sha nala kat haduh ba ka Scooty ka la sahkut hapoh ka nala.
La ïathuh ba u nongñiah uba la tip kyrteng kum u Marïawan Kynta, 27 snem ka rta na ka shnong Sohra u la mynsaw jur na ka bynta jong ka khlieh, ka kti bad ka kjat bad la pynkit noh sha Nongpoh Civil Hospital ban ïoh jingsumar.
Ki Pulit kiba la wan poi ha kane ka jaka ki la khwai noh ïa ka Scooty sha thanat bad pynlong ruh ïa ka jingtohkit kaba bniah.
